Quanquam alias codices librorum missalium iuxta rubricam ecclesie Misnensis per Reuerendissimum in christo patrem et dominum dominum Iohannem f[elicis] r[ecordationis] olim episcopum Misnensem imprimi satis exacta diligentia procurati sunt: tamen quia predicti codices multa necessaria que presentes in lucem dedere omiserunt et eorum numerus Misnensis diocesis latitudini ac personarum inibi deo famulantium & pro libris huiusmodi sepenumero auide inquirentium multitudini non satisfacit Ideo Reuerendissimus in cristo pater et dominus dominus Iohannes de Salhusen modernus misnensis ecclesie episcopus, his aliisque penuriis et defectibus succurrere uolens, presens missalium opus iuxta rubricam iam dicte sue Misnensis diocesis diligenti opera castigatum atque distinctum per industrium Conradum Kachelofen huius impressorie artis magistrum oppidique lipsensis conciuem in oppido eodem inchoari: atque grassante pestifero morbo in oppido Freiberg perfici et foeliciter finiri procurauit. Quod quidem opus ad nouarum etiam festiuitatum, pro diuini cultus augmento, institutiones aptissimum erit: quarum historie in prioribus codicibus minime habentur et in presentibus cum multis aliis specialibus uotiuis missis suo ordine annotantur ita ut hec noua uolumina cum precedentibus conferentes necessaria potius quam superuacanea fuisse animaduertant. Anno salutis quinto et nonagesimo supra quadringentesimum et millesimum, Die uero lune mensis nouembris nona. IOANNIS CUBITENSIS EPIGRAMMA Gallicus hoc nostro Conradus muneris euo Attulit: ingenio dedalicaque manu. Antistes Misne, plenus bonitate fideque, Dux erat. Auctorem lector opusque tenes.