'Weel, this efternoon, when you an' the dugs were away yer walk, I slippit in next door juist for a meenit to see hoo they were a' gettin' on, an', as I usually do, I opened the door withoot knockin' an' walked strecht ben to the kitchen, an' there, Maister Weelum, sittin' on the wee laich nursin'-chair at the fireside, was the leddy I speak o'. I gaed to gang back into the lobby; but Mrs Jardine wadna hear o't, an' she made me step in, an' she introduced me, quite the thing, mind you. Ye see, Tom's wife was toon bred, an' she kens a' the weys o't, an' she mentioned me by name an' the leddy by name; an' if she had been staunin' in a drawin'-room on a Turkey carpet, an' cled in brocade, she couldna ha'e dune it better. I juist didna catch the leddy's name, for, what wi' the suddenness, her bonny face, an' ae thing an' anither, I was sairly flabbergasted an' putten aboot. It seems, hooever, that she's in the picter-pentin' line, an' she's ta'en a great fancy to wee Isobel, an' she's makin' a portrait o' her. A week or twae bygane she saw the wee lass staunin' at the door as she was passin', an' she was so struck wi' her bonny wee face an' her lang fair hair that she spoke to her an' asked to see her mither. Weel, the upshot o' this was that, as I've said, she is pentin' her, an' a capital picter she's makin'. It's hardly finished yet. I ken fules an' bairns should never see hauf-dune wark, an' I'm no' a judge, into the bargain; but I'll say this, photographin' micht be quicker an' mair o' a deid likeness, but it's no' in it wi' yon for naturalness and bonny life-like colour. But that's by the wey, as it were. Her work is guid, withoot a doot, but she hersel's a perfect picter.' I felt my heart beginning to thump and throb, and my breath getting catchy. 'Pity you missed her name, Betty,' I said with forced unconcern. 'Ay, as I telt ye, I was putten aboot, an' missed it; but I'll speir at Mrs Jardine again, 'at will I.' 'And--and what is the lady like?' I asked, with as much indifference as I could command. 'Weel, Maister Weelum, I juist canna exactly tell ye. She's yin o' the few folks ye meet in a lifetime that ye canna judge o' or scrutinise bit by bit. It's impossible to do that wi' her; you've to tak' her in a' at aince, as it were; ye ken what I mean--eh?' I did, and I didn't; but I nodded as if I understood.