(3) And for als moche as it is longe tyme passed that ther was no generalle passage ne vyage over the see; and many men desiren for to here speke of the Holy Lond, and han therof gret solace and comfort; I, John Maundevylle, Knyght alle be it I be not worthi, that was born in Englond, in the town of Seynt Albones, passede the see, the yeer of our Lord MCCCXXII, in the day of Seynt Michelle; and hidra to have been longe tyme over the see, and have seyn and gon thorghe manye dyverse londes, and many provynces and kingdomes and iles and have passed thorghout Turkey, Percye, Surrye, Egypt the highe and the lowe, Ermonye, Inde the lasse and the more, and many iles, that ben abouten Inde where dwellen many dyverse folkes and of dyverse maneres and schappes of men, of which I schalle speke more pleynly hereafter. MANDEVILLE, _Travels_, 1370 (4) Yn Brytayn buþ meny wondres, noþeles foure buþ most wonderfol. Þe furste ys at Pectoun, þar bloweþ so strong a wynd out of þe chenes of þe eorþe þat hyt casteþ vp a[gh]e[29] cloþes þat me casteþ in. Þe secunde ys at Stonhenge, bysydes Salesbury, þar gret stones & wondur huge buþ arered[30] an hy[gh], as hyt were [gh]ates, so þat þar semeþ [gh]ates yset apon oþer [gh]ates; noþeles hyt ys no[gh]t clerlych yknowe noþer parceyuet hou[gh] & whar-fore a buþ so arered & so wonderlych yhonged. Þe þriddle ys at Cherdhol,[31] þer ys gret holwenes vndur eorþe; ofte meny men habbeþ y-be þer-ynne & ywalked aboute with-ynne & yseye ryuers & streemes, bote nowhar conneþ hy fynde ende. Þe feurþe ys, þat reyn[32] ys ys ye arered vp of þe hulles, & anon yspronge aboute yn þe feeldes. Also þer ys a gret pond þat conteyneþ þre score ylondes couenable[33] for men to dwelle ynne; þat pound ys byclypped aboute wiþ six score rooches.[34] JOHN OF TREVISA, 1387