“I hae thocht aboot that too,” answered David. “For ae thing, a body has but feow ways o’ sayin’ his say to his brithermen. Robbie Burns cud do’t in sang efter sang; but maybe this epitaph was a’ that auld Martin was able to mak’. He michtna hae had the gift o’ utterance. But there may be mair in’t nor that. Gin the clergy o’ thae times warna a gey hantle mair enlichtened nor a fowth o’ the clergy hereabouts, he wad hae heard a heap aboot the glory o’ God, as the thing ‘at God himsel’ was maist anxious aboot uphaudin’, jist like a prood creater o’ a king; an’ that he wad mak’ men, an’ feed them, an’ cleed them, an’ gie them braw wives an’ toddlin’ bairnies, an’ syne damn them, a’ for’s ain glory. Maybe ye wadna get mony o’ them ‘at wad speyk sae fair-oot noo-a-days, for they gang wi’ the tide jist like the lave; but i’ my auld minny’s buiks, I hae read jilt as muckle as that, an’ waur too. Mony ane ‘at spak like that, had nae doot a guid meanin’ in’t; but, hech man! it’s an awesome deevilich way o’ sayin’ a holy thing. Noo, what better could puir auld Martin do, seein’ he had no ae word to say i’ the kirk a’ his lifelang, nor jist say his ae word, as pithily as might be, i’ the kirkyard, efter he was deid; an’ ower an’ ower again, wi’ a tongue o’ stane, let them tak’ it or lat it alane ‘at likit? That’s a’ my defence o’ my auld luckie-daddy—Heaven rest his brave auld soul!” “But are we not in danger,” said Hugh, “of thinking too lightly and familiarly of the Maker, when we proceed to judge him so by ourselves?” “Mr. Sutherlan’,” replied David, very solemnly, “I dinna thenk I can be in muckle danger o’ lichtlyin’ him, whan I ken in my ain sel’, as weel as she ‘at was healed o’ her plague, ‘at I wad be a horse i’ that pleuch, or a pig in that stye, not merely if it was his will—for wha can stan’ against that—but if it was for his glory; ay, an’ comfort mysel’, a’ the time the change was passin’ upo’ me, wi’ the thocht that, efter an’ a’, his blessed han’s made the pigs too.” “But, a moment ago, David, you seemed to me to be making rather little of his glory.”