Þat I schal lelly yow layne, and lance neuer tale Þat euer ȝe fondet to fle for freke þat I wyst.' 'Grant merci,' quod Gawayn, and gruchyng he sayde: 'Wel worth þe, wyȝe, þat woldeȝ my gode, And þat lelly me layne I leue wel þou woldeȝ. 60 Bot helde þou hit neuer so holde, and I here passed, Founded for ferde for to fle, in fourme þat þou telleȝ, I were a knyȝt kowarde, I myȝt _n_ot be excused. Bot I wyl to þe chapel, for chaunce þat may falle, And talk wyth þat ilk tulk þe tale þat me lyste, 65 Worþe hit wele oþer wo, as þe wyrde lykeȝ hit hafe. Þaȝe he be a sturn knape To stiȝtel, and stad with staue, Ful wel con Dryȝtyn schape 70 His seruaunteȝ for to saue.' 'Mary!' quod þat oþer mon, 'now þou so much spelleȝ Þat þou wylt þyn awen nye nyme to þyseluen, And þe lyst lese þy lyf, þe lette I ne kepe. Haf here þi helme on þy hede, þi spere in þi honde, 75 And ryde me doun þis ilk rake bi ȝon rokke syde Til þou be broȝt to þe boþem of þe brem valay. Þenne loke a littel on þe launde, on þi lyfte honde, And þou schal se in þat slade þe self chapel, And þe borelych burne on bent þat hit kepeȝ. 80 Now fareȝ wel, on Godeȝ half! Gawayn þe noble; For alle þe golde vpon grounde I nolde go wyth þe, Ne bere þe felaȝschip þurȝ þis fryth on fote fyrre.' Bi þat þe wyȝe in þe wod wendeȝ his brydel, Hit þe hors with þe heleȝ as harde as he myȝt, 85 Lepeȝ hym ouer þe launde, and leueȝ þe knyȝt þere al one. 'Bi Goddeȝ self!' quod Gawayn, 'I wyl nauþer grete ne grone; To Goddeȝ wylle I am ful bayn, 90 And to Hym I haf me tone.' Thenne gyrdeȝ he to Gryngolet, and gedereȝ þe rake, Schowueȝ in bi a schore at a schaȝe syde, Rideȝ þurȝ þe roȝe bonk ryȝt to þe dale; And þenne he wayted hym aboute, and wylde hit hym þoȝt, 95 And seȝe no syngne of resette bisydeȝ nowhere, Bot hyȝe bonkkeȝ and brent vpon boþe halue, And ruȝe knokled knarreȝ with knorned stoneȝ; Þe skweȝ of þe scowtes skayned hym þoȝt. Þenne he houed, and wythhylde his hors at þat tyde, 100 And ofte chaunged his cher þe chapel to seche: He seȝ non suche in no syde, and selly hym þoȝt Sone, a lyttel on a launde, a lawe as hit we<re>, A balȝ berȝ bi a bonke, þe brymme bysyde, Bi a forȝ of a flode þat ferked þare; 105 Þe borne blubred þerinne as hit boyled hade. Þe knyȝt kacheȝ his caple, and com to þe lawe, Liȝteȝ doun luflyly, and at a lynde tacheȝ Þe rayne and his riche with a roȝe braunche.