A Tous Ceux quy ces presentes lettres verront ou orront--Denis Le Marchant, Senechal de la Cour de la prieureté de St. Michel du Val en l’Isle de Guernesey--Salut--comme ainsy soit que Martin Sauvary, comme procureur et attourné des vavasseurs, Sergeans, bordiers, et autres officiers, de la dite Cour acteurs d’une partie eussent fait semondre et convenir pardevant nous en ladite Cour John phylippe recepveur pour lors de la dite Isle de Guernesey et de ladite prieureté du Valle pour très hault et très puissant prince Mon Seigneur Le Duc de Glocester, Seigneur des Isles, et possesseur adonques de toutes les rentes et revenues quelconques appartenants a la dite prieureté en ladite Isle, deffenseur d’autre partie--Lequel attourné que dit est eust declaré et demandé adonques a l’avant dit deffenseur comment iceluy deffenseur recepveur comme dit est deubt bailler trouuer et deliurer les debuoirs et deuteys appartenants es dits Officiers de la dite Cour. C’est a sçauoir de temps en temps et toutefois et quantes qu’il leur appartient de droit et de raison. Sçauoir est les 3 disners par chacun a chascun des plaids Cappitaulx de ladite cour. C’est a sçauoir à la feste St. Michel, à Noel, et à pasques. Item leurs disners toutes fois et quantes que par le dit recepveur seront requis et contraints d’aller reuisiter les Keys de la Coste de la mer et le cours des eaux et que eux en feroient leur debvoir comment de droit et de raison il appartient à leurs offices. Item--toutes fois et quantes que les dits vavasseurs, leurs valets, et seruans et les autres Sergeants et officiers a qu’il appartient iroient en chevauchée pour reuisiter en ladite Isle leurs debvoirs semblablement--C’est a sçauoir quant eux se sont representés deuant la porte de la dite prieureté et eux doiuent monter a cheval eux doivent auoir du pain et du vin abondamment et honestement seruis--Item pareillement eux doivent estre seruis et administrer de pain et de vin par la main du prevost de mon dit seigneur deuant la porte de l’eglise de St. pierre port lequel preuost doit estre présent a la dite chevauchée; et doit estre illeques une ronde table mise fournie et garnie bien et honnestement de doublier, pain et vin es coustages de mon dit Seigneur. Item quant eux seront arrivés es portes de pleinmont eux doiueut auoir du pair et a boire et quant eux seront retournez a la dite prieureté et eux auront ainsi fait leurs debvoir eux doivent avoir a disner bien et honnestement tous ensemble es despens et coustages de mon dit Seigneur. Lequel seruice iceux officiers confessoient estre tenus de droit et de raison de trois ans en trois ans par la dignité de leurs offices. Item leurs disners semblablement toutes fois et quant qu’eux taxent les amendes de la dite cour. Item aussi a Noel et a Pasques quant eux rendent et payent les francs tenans (?) C’est a sçauoir les chapons a Noel et les oeufs a pasques. Lesquelles choses et chacune d’icelles en la forme et manière comme dessus est dit et desclaré.