'I'se no forget it in a hurry. But I canna sae weel rehearse't, atween what they said, an' what they garred a body think, tho' aiblins they mayna hae puiten their tongue til't. For it's no a thing a body daur say afore her leddyship. But Mistress Briggs, my leddy's woman kens a' about it, an' it was her telled Miss Finlayson. She kens what's been ado wi' Tibbie Tirpie this lang while back. An' she was comin' ower frae Inverlyon e'y mail coach that dark nicht the minister gaed for the bairn, an' wha suld the driver put in aside her but Tibbie Tirpie? He said it was a sair nicht for a lassie to travel her lane across the muir, sae he juist in wi' her an' stieket the door. An' deil a word she spak to Mistress Briggs the hale road, juist pu'd the plaid ower her face an' grat an' sabbet a' the time. Mistress Briggs, ye see, is verra genteel an' parteeklar, an' was for complainin', about folk bein' puiten in aside her, an' sae she telled Miss Finlayson whan she cam hame, an' the day, ye see, it cam a' back on me, when I seen Tibbie greetin' an' carryin' on e'y kirk. An' whan she gaed slinkin' hame afore the weins were brocht into baptise, thinks I to mysel', aiblins Miss Finlayson's no that far wrang!' 'I see na muckle in yer story, William,' said Angus, 'but I think the gentles micht hae better to do, nor prankin' wi' the gude name o' a puir lass 'at ne'er wranged them. An' ye're ill-aff for a job yersel' to be carryin' their clashes about the country side.' 'But ye hae na heard me out yet. It was that same dark nicht the minister gaed ower til Inverlyon. An' next mornin' he brings hame the bairn. An' wha suld he meet on the brae-head, think ye, but Captain Drysdale, (the auld captain). An' the captain speers "wha's acht the bairn," an' the minister he durstna tell, an' he looket terrible blate. An' the captain he leugh, an' the minister he grew mad, an' the captain he says--says he, "keep up yer heart," or, "dinna be ower down-cast, it's nae great matter, gin it be a bairn--it's a verra sma' ane"--an' that's the captain's ain words.' 'Preserve us a'!' ejaculated Mrs. Boague, 'Diz the sin grow heavier wi' the wecht o' the bairn? Fau'se doctrine I'se wager! But that comes o' sittin' under a moderate minister! There's saul's bluid lyin' at the door o' that prophet o' Baaul, up by at Kilrundle.' 'But wha wad hae thocht the like o' Roderick Brown?' said Angus, 'an' I maun hae pruif or I can tak it in. I hae kenned him man an' laddie sin afore he kenned himsel', an' I kenned auld Doctor Brown weel,--an' a gude man he was--an' I canna thole to think he cud gang sae far astray.'