The King that nycht his wachis set, And gert ordayne that thai mycht et; And bad thaim comford to thaim tak, And at thar mychtis mery mak. 190 ‘For disconford,’ as then said he, ‘Is the werst thing that may be. ‘For throw mekill disconforting ‘Men fallis oft in-to disparyng. ‘And fra a man disparyt be, 195 ‘Then utterly vencusyt is he. ‘And fra the hart be discumfyt, ‘The body is nocht worth a myt. ‘Tharfor,’ he said, ‘atour all thing, ‘Kepys yhow fra disparyng: 200 ‘And thynk, thouch we now harmys fele, ‘That God may yheit releve us weill. ‘Men redys off mony men that war ‘Fer hardar stad then we yhet ar; ‘And syne our lord sic grace thaim lent, 205 ‘That thai come weill till thair entent. ‘For Rome quhilum sa hard wes stad, ‘Quhen Hanniball thaim vencusyt had, ‘That, off ryngis with rich stane, ‘That war off knychtis fyngerys tane, 210 ‘He send thre bollis to Cartage: ‘And syne to Rome tuk his viage, ‘Thar to distroye the cite all. ‘And thai with-in, bath gret and small, ‘Had fled, quhen thai saw his cummyng, 215 ‘Had nocht bene Scipio the king, ‘That, or thai fled, wald thaim haiff slayn, ‘And swagat turnyt he thaim agayn. ‘Syne for to defend the cite, ‘Servandis and threllis mad he fre; 220 ‘And maid thaim knychtis evirilkane: ‘And syne has off the templis tane ‘The armys, that thar eldrys bar, ‘In name off victory offerryt thar. ‘And quhen thai armyt war and dycht, 225 ‘That stalwart karlis war and wycht, ‘And saw that thai war fre alsua, ‘Thaim thocht that thai had levir ta ‘The dede, na lat the toun be tane. ‘And with commowne assent, as ane, 230 ‘Thai ischit off the toune to fycht, ‘Quhar Hannyball his mekill mycht ‘Aganys thaim arayit was. ‘Bot, throw mycht off Goddis grace, ‘It ranyt sa hard and hevyly, 235 ‘That thar wes nane sa hardy ‘That durst in-to that place abid; ‘Bot sped thaim in-till hy to rid; ‘The ta part to thar pailyhownys, ‘The tothyr part went in the toune is. 240 ‘The rayne thus lettyt the fechtyn: ‘Sa did it twys thar-eftir syne. ‘Quhen Hanibal saw this ferly, ‘With all his gret chevalry ‘He left the toune, and held his way; 245 ‘And syne wes put to sik assay, ‘Throw the power off that cite, ‘That his lyff and his land tynt he. ‘Be thir quheyne, that sa worthily ‘Wane sik a king, and sa mychty, 250 ‘Yhe may weill be ensampill se, ‘That na man suld disparyt be: ‘Na lat his hart be vencusyt all, ‘For na myscheiff that evir may fall. ‘For nane wate, in how litill space, 255 ‘That God umquhile will send his grace. ‘Had thai fled and thar wayis gane,