micelre mede on ðære toweardan. Witodlice þurh ðines feondes lufe þu bist Godes freond; and na þæt an þæt ðu his freond sy, ac eac swilce þu bist Godes bearn, þurh ða rædene þæt þu þinne feond lufige; swa swa Crist sylf cwæð, "Lufiað eowere fynd, doð þam tela þe eow hatiað, þæt ge beon eoweres Fæder cild, seðe on heofenum is." Menigfealde earfoðnyssa and hospas wolde gehwá eaðelice forberan wið þan þæt he moste sumum rican men to bearne geteald beon, and his yrfenuma to gewitendlicum æhtum: forberað nu geðyldelice for ðam ecan wurðmynte, þæt ge Godes bearn getealde beon, and his yrfenuman on heofenlicum spedum, þæt þæt se oðer forðyldigan wolde for ateorigendlicere edwiste. We secgað eow Godes riht; healdað gif ge willon. Gif we hit forsuwiað, ne bið us geborgen. Cristes lufu us neadað þæt we simle þa gódan tihton, þæt hí on gódnysse þurhwunion; and ða yfelan we mynegiað, þæt hí fram heora yfelnessum hrædlice gecyrron. Ne beo se rihtwisa gymeleas on his anginne, ne se yfela ortruwige ðurh his unrihtwisnysse. Ondræde se goda þæt hé fealle; hogige se yfela þæt hé astande. Se ðe yfel sy geefenlæce hé Paules gecyrrednysse; se ðe gód sy þurhwunige hé on gódnysse mid Stephane; forðan ðe ne bið nán anginn herigendlic butan godre geendunge. Ælc lof bið on ende gesungen. Mine gebroðra, gyrstan-dæg gemedemode ure Drihten hine sylfne, þæt hé ðysne middangeard þurh soðe menniscnysse geneosode: nu to-dǽg se æðela cempa Stephanus, fram lichamlicere wununge gewitende, sigefæst to heofenum ferde. Crist niðer-astáh, mid flæsce bewæfed; Stephanus up-astáh, þurh his blod gewuldorbeagod. Gyrstan-dæg sungon englas "Gode wuldor on heannyssum;" nu to-dæg hí underfengon Stephanum blissigende on heora geferrædene, mid þam hé wuldrað and blissað á on ecnysse. Amen. DECEMBER XXVI. THE PASSION OF THE BLESSED STEPHEN, PROTOMARTYR.