Leur viure est ce que la chasse, & la pesche leur donnent: car ils ne labourent point: mais la prouidence paternelle de nostre bon Dieu, laquelle n'abandonne pas les passereaux mesmes, n'a point laissé ces pauures creatures, capables de luy, sans prouisiõ cõuenable, qui leur est comme par estape, assignee à chasque lune, car ils cõtent par Lunes, & en mett[~e]t treze en l'an: Par exemple donc, en Ianuier ils ont la chasse des loups marins: car cest animal, quoy qu'il soit aquatique, fraye neantmoins [43] sur certaines Isles enuiron ce temps. La chair en est aussi bõne [~q] du veau; & de plus ils font de sa graisse vn'huyle, qui leur sert de sausse toute l'annee, ils en r[~e]plissent plusieurs vessies d'orignac, qui sont deux ou trois fois plus amples & fortes que les nostres de porc; & voila leurs tonneaux de reserue. En ce mesme mois de Feurier, & iusques à la my-Mars, est la grande chasse des Castors, loutres, orignacs, ours (qui sont fort bons) & des caribous, animal moitié asne, moitié cerf. Si le t[~e]ps leur dit, ils viuent lors en grand' abondance, & sont aussi fiers que Princes & Roys; mais s'il leur est contraire, c'est grãde pitié d'eux, & souuent meurent de miserable faim. Le temps leur est contraire, quand il pleut beaucoup, & ne gele pas; parce que lors ils ne peuuent chasser ny aux eslans, ny aux [44] castors. Item: quand il nege beaucoup, & ne gele pas là dessus, car ils ne peuuent pas mener leurs chiens à la chasse, pource qu'ils enfonc[~e]t dedans, ce qu'ils ne font pas eux, parce qu'ils s'attachent des raquettes aux pieds à l'aide desquelles ils demeurent dessus: si ne peuuent-ils tant courir qu'il faudroit, la nege estãt trop molle. Autres tels miserables accidents leur arriuent, qui seroyent longs à raconter.