Ie laisse à part vn long & ennuyeux silence où l'on est reduit. I'entends pour les nouueaux qui n'ont par fois en leur compagnie personne de leur langue, & ne sçauent [125] celle des Sauuages. Or ces difficultez comme elles sont ordinaires, aussi nous ont elles esté communes auec tous ceux qui viennent en ces Pays. Mais en nostre voyage nous en auons eu tous d'extraordinaires. La premiere a esté qu'il nous a fallu continuellement ramer, ny plus ny moins que les Sauuages: de sorte que ie n'auois le loisir de reciter mon Breuiaire sinon à la couchée, lors que i'eusse eu plus de besoin de repos que de trauail. L'autre a esté qu'il nous falloit porter nos pacquets, és portages, ce qui nous estoit aussi dur que nouueau, & encore plus aux autres qu'à moy, qui sçait desia vn peu ce que c'est que de fatigue. A chaque portage il me falloit faire au moins quatre voyages, les autres n'en faisoiẽt gueres moins. I'estois desia venu aux Hurõs vne autre fois, mais ie n'auois point manié [126] l'auiron, ny porté de fardeaux non plus que les autres Religieux, qui auoient aussi fait le mesme chemin. Mais en ce voyage il nous a fallu tous commencer par ces experiences à porter la Croix que Nostre Seigneur nous presente pour son honneur, & pour le salut de ces pauures Barbares. Certes ie me suis trouué quelquesfois si las, que le corps n'en pouuoit plus. Mais d'ailleurs mon ame ressentoit de tres-grands contentemens, considerant que ie souffrois pour Dieu: nul ne le sçait, s'il ne l'experimente. Tous n'en ont pas esté quittes à si bon marché.