Le Pere Daniel fut delaissé & contraint de changer de canot, comme aussi pareillemẽt Pierre l'vn de nos hommes; le petit Martin fut bien rudement traitté, & en fin abandonné aux Bissiriniens, où il demeura si long-temps, qu'il fut quelques deux mois en chemin, & n'arriua aux Hurons que le dix-neufiéme de Septembre. Baron fut volé par les siens la mesme iournée qu'il arriua en ces contrées, & eust encore bien plus perdu, s'il ne les eust contraints par la peur de ses armes luy en rendre quelque partie. Bref [128] tous les François y ont souffert de grandes peines, fait de grosses dépenses, eu égard à leurs petites commoditez, & couru de notables dangers. Et quiconque montera icy haut, se doit resoudre à tout cela, & à quelque chose de plus; mesme à la mort, dont on voit à chaque moment l'Image deuant les yeux. Pour moy qui ne sçais point nager ie m'en suis veu vne fois fort proche: car au partir des Bissiriniens en descendant vn saut, nous-nous en allions tomber dedans vn precipice, si mes Sauuages n'eussent promptement & habilement sauté en l'eau, pour destourner le canot que le courant emportoit. Il est croyable que les autres en pourroient bien dire autant & plus, veu le nombre qu'il y a de semblables rencontres. Trois autres difficultez m'ont donné de la peine en mon particulier. La premiere, [129] l'importunité que mes gens me firent du commencement, pour cacher en quelque part vne quaisse qu'vn de nos François auoit mise dãs nostre canot. La seconde, le soing de ceux de nos gens, que nous auions laissé derriere. La troisiesme, que les Algonquains par où nous passions taschoient de nous intimider, disans que les Hurons nous tueroiẽt, comme ils auoient fait en la personne de Brulé, desirans de nous retenir chez eux, auec beaucoup de demonstration de bienueillance. Depuis nostre arriuée, i'ay appris que le Maistre de mon canot auoit ietté en auant de me degrader en quelque part, auec mon petit bagage; mais que sa proposition auoit esté aussi-tost rebuttée; aussi ne m'en fit-on iamais aucun semblant. Tout cela, Dieu mercy, ne me tourmenta pas beaucoup. Car leur ayant declaré [130] que ie porterois moy-mesme la quaisse dont il estoit question, quoy qu'ils en eussent receu le port; ie me resigné, quant au reste, à la volonté de Dieu, prest à mourir pour l'honneur de son Fils nostre bon Seigneur, & pour le salut de ces pauures Peuples.