46 De periculis et tormentis in valle infausta. 47 De Bragmannorum insulis, et aliorum. 48 Aliquid de loco Paradisi terrestris per auditum. 49 In reuertendo de Regnis Cassam, et Riboth, de Diuite Epulone, vel consimili. 50 De compositione huius tractatus in Ciuitate Leodiensi. Liber Praesens, Cvivs Avthor est Ioannes Mandevil militaris ordinis, agit de diuersis patrijs, Regionibus, Prouincijs, et insulis, Turcia, Armenia maiore et minore, AEgypto, Lybia bassa et alta, Syria, Arabia, Persia, Chaldaea, Tartaria, India, et de infinitis insulis, Ciuitatibus, villis, castris, et locis, quae gentes, legum, morum, ac rituum inhabitant diuersorum. DEDICATIO LIBRI. Principi excellentissimo, prae cunctis mortalibus praecipue venerando, Domino Edwardo eius nominis tertio, diuina prouidentia Francorum et Anglorum Regi Serenissimo, Hiberniae Domino, Aquitainiae Duci, mari ac eius insulis occidentalibus dominanti, Christianorum encomio et ornatui, vniuersorumque arma gerentium Tutori, ac Probitatis et strenuitatis exemplo, principi quoque inuicto, mirabilis Alexandri Sequaci, ac vniuerso orbi tremendo, cum reuerentia non qua decet, cum ad talem, et tantam reuerentiam minus sufficientes extiterint, sed qua paruitas, et possibilitas mittentis ac offerentis se extendunt, contenta tradantur. Pars prima, continens Capita 23. CAPVT. 1. Commendatio breuis terrae Hierosolimitanae. Cum terra Hierosolimitana, terra promissionis filiorum Dei, dignior cunctis mundi terris sit habenda multis ex causis, et praecipue illa, quod Deus conditor coeli et mundi, ipsam tanti dignatus fuit aestimare, vt in eo proprinm filium saluatorem mundi, Christum exhibuerit generi humano per incarnationem ex intemerata Virgine, et per eius conuersationem humillimam in eadem, ac per dolorosam mortis suae consummationem ibidem, atque inde per eius admirandam resurrectionem, ac ascensionem in coelum, et postremo quia creditur illic in fine seculi reuersurus, et omnia iudicaturus: certum est, quod ab omnibus qui Christiano nomine a Christo dicuntur, sit tanquam a suis proprijs haeredibus diligenda, et pro cuiusque potestate ac modulo honoranda. [Sidenote: Loquitur secundum tempora in quibus vixit.] A principibus quidem, et potentibus vt ipsam conentur de infidelium manibus recuperare, qui eam iam pridem a nobis, nostris exigentibus meritis, abstulerunt, et per annos heu plurimos possederunt: a mediocribus antem et valentibus, vt per peregrinationem deuotam loca tam pia, et vestigia Christi ac discipolorum tam Sancta, principaliter in remissionem visitent delictorum. Ab impotentibus vero, et impeditis, quatenus supradictos vel hortentur, vel in aliquo modo iuuent, seu certe fideles fondant orationes. Verum quia iam nostris temporibus verius quam olim dici potest, Virtus, Ecclesia, Clerus, daemon, symonia, Cessat, calcatur, errat, regnat, dominatur,