"Ay, sir,—a bonnie lassie, wi’ een like slaes, cheeks redder than rowans, and skin like the drifted snaw; but she has been a dooms unlucky jo for Angus. I’ll tell ye the haill story. Ye maun ken, sir, that mony months gane past, when we were quartered in Almendralejo, Angus fell over the lugs in love wi’ this braw gilpie, whan we were billeted in her ain house. Ye heard frae Mr. Macdonald o’ the toosle we had wi’ her cuisins, and unco’ auld Turk o’ a faither. Hech! it was a teugh job, wi’ sharp skenes and bayonets, and a’ that. Weel, sir; syne the day Angus first tint sicht o’ that lassie, he has never been the same rattling, roaring kind o’ chield he was; but ay wae and dowie, soughing and sighing till it was gruesome to hear him. Yesterday, or the day before it, when coming ower the hills,—ye mind the bit clachan we stoppit at for a night’s rest?" "Los Cazas de Don Gomez?" "Ay, sir, just sae,—a deevil o’ a lang nebbit name! At a wine-house there Angus and I forgathered wi’ a muleteer loon frae Almendralejo,—Lazaro Gomez, he ca’d himsel. Ye’ll may be mind o’ him?" "Perfectly; but be quick with your story." "Aweel, sir, the mule-driver gied us a’ the news and clashin frae aboot Merida and ither places, and amang ither things tauld Angus that auld Sancho Garcionados,—or _el Picaro_, as the Spaniards ay ca’ a lawyer, was gaun to compel the lassie, whether she wad or no, to marry a rich alcalde. Od, sir! I never saw a face change as puir Mackie’s did, while the carrier callant chatted awa wi’ us in his broken English, never kennin’ the while that ilka word was fa’in’ like scaudin’ lead into the heart b’ puir Angus. He came to me that nicht at tatto beat, and said he could thole this life no anither minute, and that—come weal, come wae, he would gang off for Almendralejo, and save the lassie or dee wi’ her. I did a’ I could to pacify him, but he minded me nae mair than the wind whistlin’ ower the muir. He came to me whan I was on sentry at the toon end. His een were glistening, his face was white, like that o’ something no cannie, and his gartered knees were chaffing thegither. I grew eerie to look at him, for the nicht was dark and gloomy, and the wind came soughing doon frae the hills wi’ a sound like the moan o’ a deid man. Ae starnie was glintin on the hill-tap, and I saw the reflection o’d in the rinnin water,[*] which passes the toon wa’s. Angus stretched his hands towards the bit starnie, and said it was shinin’ ower Almendralejo then,—and may be, his ain true love was lookin’ at it; and that it hung like a lamp in the mirky, lift to guide him to whar she bided. [*] The Alagona river, which passes Coria. "’Hoots, havers!’ said I, ’ye’ll sune get ower’d; and may be that gomeral mule-driver’s story o’ auld Sancho’s dochter was a’ a lee,—every word o’t. Gang hame to your bed, my man, and ye’ll be better the morn.’