When those cruell wolves had, as thei supposed, cleane devored the pray, thei fynd thame selfis in warse caise then thei war befoir; for then within Sanctandrose, yea, almost within the hole realme, (who heard of that fact,) thair was none found who begane not to inquyre, Whairfoir was Maistir Patrik Hammyltoun brunt? And when his Articles war rehersed, questioun was holden, yf such Articles war necessarie to be beleved under the pane of damnatioun. And so within schort space many begane to call in dowbt that which befoir thei held for a certane veritie, in so much that the Universitie of Sanctandrose, and Sanct Leonardis Colledge principallie, by the labouris of Maistir Gawin Logy,[69] and the novises[70] of the Abbay, by the Suppriour,[71] begane to smell somwhat of the veritie, and to espy the vanitie of the receaved superstitioun. Yea, within few yearis eftir, begane baith Black and Gray Frearis publictlie to preache against the pride and idile lief of Bischoppis, and against the abuses of the whole ecclesiasticall estaite. Amongis whome was one called Frear Williame Arth,[72] who, in a sermone preached in Dundye, spak somwhat moir liberallie against the licentious lyifes of the Bischoppis nor thei could weall beair. He spaik farther against the abuse of curssing and of miracles. The Bischop of Brechin,[73] having his placeboes and jackmen in the toun, buffatted the Freir, and called him Heretick. The Freir, impatient of the injury receaved, past to Sanctandrose, and did communicat the headis of his sermone with Maister Johnne Mair,[74] whose wourd then was holden as ane oracle, in materis of religioun; and being assured of him, that such doctrin mycht weall be defendid, and that he wald defend it, for it conteaned no heresye; thair was ane day appointed to the said Frear, to maik repetitioun of the sam sermon; and advertisment was gevin to all such as war offended att the formar to be present. And so, in the parishe kirk of Sanctandrose, upoun the day appointed, appeared the said Frear, and had amonges his auditouris Maistir Johnne Mair, Maistir George Lockart,[75] the Abbot of Cambuskynneth,[76] Maistir Patrik Hepburne the Priour of Sanctandrose,[77] with all the Doctouris and Maistires of the Universities. The theame of his sermone was, "Veritie is the strongest of all thingis." His discourse of Curssing was, "That yf it war rychtlie used, it was the moist fearfull thing upoun the face of the earth; for it was the verray separatioun of man frome God: but that it should nott be used rashlie, and for everie light cause, but onlie against open and incorrigible synnaris. But now, (said he,) the avarice of preastis, and the ignorance of thair office, has caused it altogitther to be vilipended;[78] for the preast, (said he,) whose dewitie and office is to pray for the people, standis up on Sounday, and cryes, 'Ane hes tynt a spurtill. Thair is ane flaill stollin from thame beyound the burne.