The goodwyiff of the other syd of the gait hes tynt a horne spune. Goddis maleson and myne I geve to thame that knowis of this geyre, and restoris it not.'"--How the people mocked thair curssing, he ferther told a meary tale; how, after a sermoun that he had maid at Dumfermling, he came to a house whair gossoppis was drynking thair Soundayis penny, and he, being dry, asked drynk. "Yis, Father, (said ane of the gossoppes,) ye shall haif drynk; bot ye mon first resolve ane doubt which is rissen amongis us, to witt, What servand will serve a man beast on least expenssis." "The good Angell, (said I,) who is manis keapar, who maikis great service without expenssis." "Tush, (said the gossope,) we meane no so heigh materis: we meane, What honest man will do greatest service for least expensses?" And whill I was musing, (said the Frear,) what that should meane, he said, "I see, Father, that the greatest clerkis ar nott the wysest men. Know ye not how the Bischoppis and thair officiallis servis us husband men? Will thei not give to us a lettir of Curssing for a plack, to laste for a year, to curse all that looke ower our dick [dyke]? and that keapis our corne better nor the sleaping boy, that will have three schillingis of fye, a sark, and payre of schone in the year. And thairfoir, yf thair curssing dow any thing, we held the Bischoppis beast chaip servandis, in that behalf, that ar within the realme." As concernyng miracles, he declaired, what diligence the ancientis took to try trew miracles frome false. "But now, (said he,) the greadynes of preastis not onlie receave false miracles, bot also thei cherise and feis knaiffis for that purpoise, that thair chapellis may be the better renouned, and thair offerand may be augmented. And thairupoun ar many chapelles founded, as that our Lady war mychttiar, and that sche took more pleasour in one plaice then in ane uther; as of laite dayis our Lady of Karsgreng hes hopped fra ane grene hillock to ane uther. But honest men of Sanctandrose, (said he,) yf ye luif your wyffis and your doughtaris, hald thame at hame, or ellis send thame in honest companye; for yf ye knew what miracles war kithed thaire, ye wold neyther thank God nor our Lady." And thus he mearelie tanted thare trystis of hurdome and adulterye used at such devotioun. Ane uther article was judged more hard; for he alledged the commoun law,[79] That the Civyle Magistrate mycht correct the Churchmen,[80] and deprive thame of thaire benefices, for oppin vices.