Betuix Kirkcaldie and Kingorne; But lymmars made therat sic skorne, And to his fame maide sic degressioun, Sensyne he hard not the Kinges confessioun.[185] Thoicht at that tyme he came na speid, I pray yow tak guid will as deid; And him amongest your selves receave, As ane worth mony of the leave. Quhat I obteyne may, through his arte, Ressoun wald ye had your parte. Your Ordour handles na monye, But for uther casualitie, As beif, meill, butter, and cheiss, Or quhat that we have, that ye plese, Send your Bretheren _et habete_. As now nocht elles, but _valete_. Be THOMAS your brother at command, A cullurune kythed throw many a land.[186] When God had gevin unto that indurat Prince sufficient documentis, that his rebellioun against his blessed Evangell should not prosperouslie succeid, hie rases up against him warr, as that he did against obstinat Saull, in the which he miserablie perrished, as we shall after hear. The occasioun of the Warr was this. Hary the Eight, King of England, had a great desyre to have spokin with oure King; and in that poynt travailled so long, till that he gat a full promesse[187] maid to his Ambassadour, Lord Williame Hawart. The place of meatting was appointed [at] York; which the King of England keap[t] with such solempnitie and preparationis, as never for such ane purpoise was sein in England befoir. Great brute of that jorney, and some preparatioun for the same was maid in Scotland; but in the end, by persuasioun of the Cardinall David Betoun, and by otheris of his factioun, that jorney was stayed, and the Kinges promesse falsefeid. Whareupoun war scharpe letteris of reproch send unto the King,[188] and also unto his Counsall. King Hary frustrat, returned to London, and after his indignatioun declaired, began to fortifie with men his frontearis foranent Scotland. Thare war send to the Bordouris Sir Robert Bowis, the Erle of Anguss, and his brother, Sir George Duglass. Upoun what uther trifeling questionis, (as for the debatable land and such like,) the war brak up, we omitt to wryte. The principall occasioun was the falsefeing of the promeisse befoir maid. Oure King perceaving that the warr wald ryse, asked the Prelattis and Kirkmen, what supporte thei wald maik to the susteanyng of the same; for rather wald he yitt satisfie the desyre of his Uncle, then he wald hasard warr, whare hie saw nott his force able to resist. Thei promissed montanes of gold, (as Sathan thaire father did to Christ Jesus yf he wold wirschipe him;) for rather wold thei have gone to hell, or he should have mett wyth King Hary: for then, thought thei, Fayr weill our kingdome; and fayr weill, thought the Cardinall, his credite and glorie in France. In the end, thei promissed fyftie thousand crownes by year,[189] to be weall payed, so long as the warres lested; and farther, that thaire servandis, and otheris that appartened unto thame,