The same yere, upon seynt Leonardes day, the kyng Herry the vj^{te}, noughfully viij yere old, was crowned at Westm';[115] at whos coronacion was mad xxxv knyghtes; and on Seynt Georges day nest folwynge, afore noon, he passyd over the see to Caleys: also the xxiij day of May, after noon ayens nyght, before the town of Compigne, there was a woman taken armed in the feld, with many othere capitayns, the whiche was called _la pucelle de Dieu_, a fals wyche, for thorugh here power the dolphyn and alle oure adversaries trusted holy to have conquered ayen alle Fraunce, and nevere to an had the wers in place that sche hadde ben inne, for they helden here amonges them as for a prophetesse and a worthy goddesse. Also the same yere, aboughte Candelmasse, Richard Hunden, a wolle packer, was dampned as a fals heretyk and a lollard, and brent at the Tour hill, the whiche was of so large consciens that he wolde eten fleysh on Frydays.[116] [Footnote 115: _See note_ TT.] [Footnote 116: _See note_ UU.] Nicholl Wotton. Rob't Large, m'c'. A^{o}. ix^{o}. Walt' Chertesey. [Sidenote: Lollard.] [Sidenote: Lollardes.] [Sidenote: Jakke Sharp a lollerd was behedyd at Abyndon.] This same yere aboughte Mydlenten was S^{r}. Thomas Baggeley, prest and vyker of Mabenden in Essex, besyde Walden, dysgraded of his presthod and dampned as for an heretyk, and afterward brent in Smythfeld. Also the same yere, in somer, the kyng beynge in Fraunce with alle hise temperall lordes for the most partye, the lollardes, with manye mo othere that weren enclyned to there secte, casted billes aboughte in every good town in Engelond, and purposed for to have made a rysyng and distroyed Holy Chirche and the reaume; but, thanked be Almyghty God, there falsnesse and there treson was sone aspyed and distroyed; for on William Maundevyll, sum tyme a wever of Abendon, and bailly of the town, that called hymself Jakke Sharp of Wygemoresland in Walys, and schulde a ben chief mayster of them alle, was taken at Oxenford, and hedyd at the seid toun of Abyndon, on Tuesday in Whitson wyke, with many mo of his felas, and in many mo othere places of the reaume also. REX HENRICUS SEXTUS. [1431-1433.] John Welles, groc', maior. John Atherley. A^{o}. x^{mo}. Stephan Broun. [Sidenote: Kyng Herry was crowned kyng of Fraunce.] This same yere, the xvj day of Decembre, G beynge the dominical lettre, kyng Herry the vj^{te} was crowned kyng of Fraunce at Parys, in the chirche of Notre Dame, with gret solempnyte and rialte; and anoon after he turned ayen into Engelond, and landed at Dovorr the ix day of Feverer', and come to London the xxj day of the same month, where he was ryally resceyved, alle the craftes rydynge ayens hym all in white. John P'ueys, drap'. John Olneye, m'c'. A^{o}. xj^{mo}. John[117] Pattesley, jueler. [Footnote 117: "Robert" _in the Cotton MS._] [Sidenote: Soudeors were arest.]