Une ymage ot empres escrite, Qui sembloit bien estre ypocrite, _Papelardie_ ert apelee. C'est cele qui en recelee, Quant nus ne s'en puet prendre garde, De nul mal faire ne se tarde. El fait dehors le marmiteus, Si a le vis simple et piteus, Et semble sainte creature; Mais sous ciel n'a male aventure Qu'ele ne pense en son corage. Moult la ressembloit bien l'ymage Qui faite fu a sa semblance, Qu'el fu de simple contenance; Et si fu chaucie et vestue Tout ainsinc cum fame rendue. En sa main un sautier tenoit, Et sachies que moult se penoit De faire a Dieu prieres faintes, Et d'appeler et sains et saintes. El ne fu gaie ne jolive, Ains fu par semblant ententive Du tout a bonnes ovres faire; Et si avoit vestu la haire. Et sachies que n'iere pas grasse. De jeuner sembloit estre lasse, S'avoit la color pale et morte. A li et as siens ert la porte Deveee de Paradis; Car icel gent si font lor vis Amegrir, ce dit l'Evangile, Por avoir loz parmi la vile, Et por un poi de gloire vaine, Qui lor toldra Dieu et son raine. * * * * * * _Comment le traistre Faulx-Semblant Si va les cueurs des gens emblant, Pour ses vestemens noirs et gris, Et pour son viz pasle amaisgris._ 'Trop sai bien mes habiz changier, Prendre l'un, et l'autre estrangier. Or sui chevaliers, or sui moines, Or sui prelas, or sui chanoines, Or sui clers, autre ore sui prestres, Or sui desciples, or sui mestres, Or chastelains, or forestiers: Briement, ge sui de tous mestiers. Or resui princes, or sui pages, Or sai parler trestous langages; Autre ore sui viex et chenus, Or resui jones devenus. Or sui Robers, or sui Robins, Or cordeliers, or jacobins. Si pren por sivre ma compaigne Qui me solace et acompaigne, (C'est dame Astenance-Contrainte), Autre desguiseure mainte, Si cum il li vient a plesir Por acomplir le sien desir. Autre ore vest robe de fame; Or sui damoisele, or sui dame, Autre ore sui religieuse, Or sui rendue, or sui prieuse, Or sui nonain, or sui abesse, Or sui novice, or sui professe; Et vois par toutes regions Cerchant toutes religions. Mes de religion, sans faille, G'en pren le grain et laiz la paille; Por gens avulger i abit, Ge n'en quier, sans plus, que l'abit. Que vous diroie? en itel guise Cum il me plaist ge me desguise; Moult sunt en moi mue li vers, Moult sunt li faiz aux diz divers. Si fais cheoir dedans mes pieges Le monde par mes privileges; Ge puis confesser et assoldre, (Ce ne me puet nus prelas toldre,) Toutes gens ou que ge les truisse; Ne sai prelat nul qui ce puisse, Fors l'apostole solement Qui fist cest establissement Tout en la faveur de nostre ordre.' FOOTNOTES: