Cleomades vit un chastel encoste un plain, tres fort et bel, ou il ot mainte bele tour. bos et rivieres vit entour, vignes et praieries grans. mult fu li chastiaus bien seans. la facon dou castel deisse, mais je dout mult que ne meisse trop longement au deviser: pour ce m'en voel briement passer. Du chastel vous dirai le non: miols seant ne vit aine nus hom, lors l'apieloit on Chastel-noble. n'ot tel dusque en Constantinoble, ne de la dusque en Osterice n'ot plus bel, plus fort ne plus rice. carmans a cel point i estoit que Cleomades vint la droit. forment li sambloit li chastiaus de toutes pars riches et biaus. Cleomades lors s'avisa que viers le chastel se trera. bien pensoit qu'en tel liu manoient gent qui de grant afaire estoient. che fu si qu'apries l'ajournee mult faisoit bele matinee, car mais estoit nouviaus entres: c'est uns tans ki mult est ames et de toutes gens conjois; pour cou a non mais li jolis. une tres grant tour haute et forte avoit ases pries de la porte, ki estoit couverte de plon, plate deseure, car adon les faisoit on ensi couvrir pour engins et pour assallir. Cleomades a avisee la tour ki estoit haute et lee; lors pense qu'il s'arestera sor cele tour tant qu'il savra, se il puet, la certainite quel pais c'est la verite. lors a son cheval adrechie viers la tour de marbre entaillie. les chevilletes si tourna que droit sour la tour aresta. si coiement s'est avales que sour aighe coie vait nes. [Sidenote: Raoul de Houdenc.]