"Dinna think 'at we juist lay in our beds or sat round the fire shakkin' wi' fear. Everything 'at could be dune was dune. In the daytime, when naething was heard, the masons explored ae place i' the farm, in the hope o' findin' oot 'at the sound was caused by sic a thing as the wind playin' on the wood in the garret. Even at nichts, when they couldna sleep wi' the soond, I've kent them rise in a body an' gang all ower the house wi' lichts. I've seen them climbin' on the new steadin', crawlin' alang the rafters, haudin' their cruizey lamps afore them, an' us women-bodies shiverin' wi' fear at the door. It was on ane o' thae nights 'at a mason fell off the rafters an' broke his leg. Weel, sic a state was the men in to find oot what it was 'at was terrifyin' them sae muckle, 'at the rest o' them climbed up at aince to the place he'd fallen frae, thinkin' there was something there 'at had fleid im. But though they crawled back an' forrit there was naething ava. "The rockin' was louder, we thocht, after that nicht, an' syne the men said it would go on till somebody was killed. That idea took a richt haud o' them, an' twa ran awa back to Tilliedrum, whaur they had come frae. They gaed thegither i' the middle o' the nicht, an' it was thocht next mornin' 'at the ghost had spirited them awa. "Ye couldna conceive hoo low-spirited we all were after the masons had gien up hope o' findin' a nat'ral cause for the soond. At ord'nar times there's no ony mair lichtsome place than a farm after the men hae come in to their supper, but at the Bog we sat dour an' sullen; an' there wasna a mason or a farm-servant 'at would gang by 'imsel as far as the end o' the hoose whaur the peats was keepit. The mistress maun hae saved some siller that spring through the Egyptians (gypsies) keepin' awa, for the farm had got sic an ill name, 'at nae tinkler would come near 't at nicht. The tailorman an' his laddie 'at should hae bidden wi' us to sew things for the men, walkit off fair skeered one mornin', an' settled doon at the farm o' Craigiebuckle fower mile awa, whaur our lads had to gae to them. Ay, I mind the tailor's sendin' the laddie for the money owin' him; he hadna the speerit to venture again within soond o' the cradle 'imsel. The men on the farm though, couldna blame 'im for that. They were juist as flichtered themsels, an' mony a time I saw them hittin' the dogs for whinin' at the soond. The wy the dogs took on was fearsome in itsel, for they seemed to ken, aye when nicht cam on, 'at the rockin' would sune begin, an' if they werena chained they cam runnin' to the hoose. I hae heard the hale glen fu, as ye micht say, wi' the whinin' o' dogs, for the dogs on the other farms took up the cry, an' in a glen ye can hear soonds terrible far awa at nicht.