"Ye may say I was a muckle gowk. And ye may lauch at a bairn for greitin' efter the mune; but I doot that same avarice o' the wee man comes frae a something in him that he wad be ill aff wi'oot. Better greit for the mune than no be cawpable o' greetin' for the mune. And weel I wat, I grat for the mune, or a' was dune, and didna get it, ony mair than the lave o' my greedy wee brithers." The night had gathered thick about them. And for a few moments out of the darkness came no sound. At length Mr Cupples resumed: "I maun jist confess, cauf that I was--and yet I wad hae been a greater cauf gin it hadna been sae--I cud hae lickit the verra dist aff o' the flure whaur her fit had been. Man, I never saw onything like her, The hypostasis o' her was jist perfection itsel'. Weel, ae nicht--for I wrocht full late, my een war suddenly dazed wi' the glimmer o' something white. I thocht the first minute that I had seen a ghost, and the neist that I was a ghost mysel'. For there she was in a fluffy cloud o' whiteness, wi' her bonny bare shouthers and airms, and jist ae white rose in her black hair, and deil a diamond or ruby aboot her! "'It's so hot,' said she, 'in the drawing-room! And they're talking such nonsense there! There's nobody speaks sense to me but you, Mr Cupples.' "''Deed, mem,' says I, 'I dinna ken whaur it's to come frae the nicht. For I hae nae sense left but ane, and that's nearhan' 'wi' excess o' brightness blind.' Auld Spenser says something like that, doesna he, mem?' I added, seein' that she luikit some grave. But what she micht hae said or dune, I dinna ken; for I sweir to ye, bantam, I know nothing that happent efter, till I cam' to mysel' at the soun' o' a lauch frae outside the door. I kenned it weel eneuch, though it was a licht flutterin' lauch. Maybe I heard it the better frae the conductin' pooer o' timmer, for my broo was doon o' the buirds o' the flure. I sprang to my feet, but the place reeled roon', and I fell. It was the lauch that killed me. What for sud she lauch?--And sic a ane as her that was no licht-heidit lassie, but cud read and unnerstan', wi the best? I suppose I had gane upo' my knees till her, and syne like the lave o' the celestials she tuik to her feathers and flew. But I ken nae mair than this: that for endless ages I gaed followin' her through the heavenly halls, aye kennin as sure's gospel that she was ahint the neist door, and aye openin' that door upon an empty glory, to be equally certain that she was ahint the neist. And sae on I gaed till, ahint ane o' the thoosan' doors, I saw the reek-enamelled couples o' my auld mither's bit hoosie upo' the mairgin o' the bog, and she was hingin' ower me, sayin' her prayers as gin she wad gang efter them like a balloon wi' verra fervour. And whan she saw my een open, she drappit upo' her knees and gaed on prayin'. And I wonner that thae prayers warna hearkent till. I never cud unnerstan' that." "Hoo ken ye that they warna hearkent till?" asked Alec.