Here Andrew Constable dropped in, and Chapman turned towards him with the question: "Did _ye_ hear, Mr Constable, what the loons did to Robert Bruce the nicht afore last?" "No. What was that? They hae a spite at puir Rob, I believe." "Weel, it didna look a'thegither like respeck, I maun alloo.--I was stannin' at the coonter o' his shop waitin' for an unce o' sneeshin'; and Robert he was servin' a bit bairnie ower the coouter wi' a pennyworth o' triacle, when, in a jiffey, there cam' sic a blast, an' a reek fit to smore ye, oot o' the bit fire, an' the shop was fu' o' reek, afore ye could hae pitten the pint o' ae thoom upo' the pint o' the ither. 'Preserve's a'!' cried Rob; but or he could say anither word, butt the house, scushlin in her bauchles, comes Nancy, rinnin', an' opens the door wi' a scraich: 'Preserve's a'!' quo' she, 'Robert, the lum's in a low!' An' fegs! atween the twa reeks, to sunder them, there was nothing but Nancy hersel. The hoose was as fu' as it cud haud, frae cellar to garret, o' the blackest reek 'at ever crap oot o' coal. Oot we ran, an' it was a sicht to see the crater wi' his lang neck luikin' up at the chimleys. But deil a spark cam' oot o' them--or reek either, for that maitter. It was easy to see what was amiss. The loons had been o' the riggin, and flung a han'fu' o' blastin' powther down ilka smokin' chimley, and syne clappit a divot or a truf upo' the mou' o' 't. Deil ane o' them was in sicht, but I doobt gin ony o' them was far awa'. There was naething for't but get a ladder, and jist gang up an' tak aff the pot-lids. But eh! puir Robert was jist rampin' wi' rage! No 'at he said muckle, for he daur hardly open his mou' for sweerin'; and Robert wadna sweer, ye ken; but he was neither to haud nor bin'." "What laddies war they, Charles, do ye ken?" asked Andrew. "There's a heap o' them up to tricks. Gin I haena the rheumateese screwin' awa' atween my shoothers the nicht it wonna be their fau'ts; for as I cam' ower frae the ironmonger's there, I jist got a ba' i' the how o' my neck, 'at amaist sent me howkin' wi' my snoot i' the snaw. And there it stack, and at this preceese moment it's rinnin' doon the sma' o' my back as gin 't war a burnie doon a hillside. We maun hae mair constables!" "Hoot! toot! Charles. Ye dinna want a constable to dry yer back. Gang to the gudewife wi' 't," said Andrew, "she'll gie ye a dry sark. Na, na. Lat the laddies work it aff. As lang's they haud their han's frae what doesna belang to them, I dinna min' a bit ploy noo and than. They'll noo turn oot the waur men for a pliskie or twa."