"What scunnered me wes the wy the bairns were ta'en in wi' him. Man, a've seen him tak a wee laddie on his knee that his ain mither cudna quiet, an' lilt 'Sing a song o' saxpence' till the bit mannie wud be lauchin' like a gude ane, an' pooin' the doctor's beard. "As for the weemen, he fair cuist a glamour ower them; they're daein' naethin' noo but speak aboot this body and the ither he cured, an' hoo he aye hed a couthy word for sick fouk. Weemen hae nae discernment, Milton; tae hear them speak ye wud think MacLure hed been a releegious man like yersel, although, as ye said, he wes little mair than a Gallic. "Bell Baxter was haverin' awa in the shop tae sic an extent aboot the wy MacLure brocht roond Saunders when he hed the fever that a' gied oot at the door, a wes that disgusted, an' a'm telt when Tammas Mitchell heard the news in the smiddy he wes juist on the greeting. "The smith said that he wes thinkin' o' Annie's tribble, but ony wy a' ca' it rael bairnly. It's no like Drumtochty; ye're setting an example, Milton, wi' yir composure. But a' mind ye took the doctor's meesure as sune as ye cam intae the pairish." It is the penalty of a cynic that he must have some relief for his secret grief, and Milton began to weary of life in Jamie's hands during those days. Drumtochty was not observant in the matter of health, but they had grown sensitive about Dr. MacLure, and remarked in the kirkyard all summer that he was failing. "He wes aye spare," said Hillocks, "an' he's been sair twisted for the laist twenty year, but a' never mind him booed till the year. An' he's gaein' intae sma' buke (bulk), an' a' dinna like that, neeburs. "The Glen wudna dae weel withoot Weelum MacLure, an' he's no as young as he wes. Man, Drumsheugh, ye micht wile him aff tae the saut water atween the neeps and the hairst. He's been workin' forty year for a holiday, an' it's aboot due." Drumsheugh was full of tact, and met MacLure quite by accident on the road. "Saunders 'ill no need me till the shearing begins," he explained to the doctor, "an' a'm gaein' tae Brochty for a turn o' the hot baths; they're fine for the rheumatics. "Wull ye no come wi' me for auld lang syne? it's lonesome for a solitary man, an' it wud dae ye gude." "Na, na, Drumsheugh," said MacLure, who understood perfectly, "a've dune a' thae years withoot a break, an' a'm laith (unwilling) tae be takin' holidays at the tail end. "A'll no be mony months wi' ye a' thegither noo, an' a'm wanting tae spend a' the time a' hev in the Glen. Ye see yersel that a'll sune be getting ma lang rest, an' a'll no deny that a'm wearyin' for it."