“The bride cam’ out o’ the byre, And O as she dichted her cheeks! Sirs, I’m to be married the night, An’ have neither blankets nor sheets; Have neither blankets nor sheets, Nor scarce a coverlet too; The bride that has a’ thing to borrow, Has e’en richt mickle ado. Woo’d and married and a’, Kissed and carried awa’! And was nae she very well off That was woo’d and married and a’? Out spake the bride’s father As he cam’ in frae the pleugh; O haud your tongue, my dochter, And ye’se get gear eneugh; The stirk that stands i’ th’ tether, And our braw bawsint yade, Will carry ye hame your corn— What would ye be at, ye jade? Out spake the bride’s mither, What deil needs a’ this pride? I had nae a plack in my pouch That night I was a bride; My gown was linsey woolsey, And ne’er a sark ava; And ye hae ribbons and buskins Mae than ane or twa. Out spake the bride’s brither, As he cam’ in wi’ the kye; Poor Willie wad ne’er hae ta’en ye Had he kent ye as weel as I; For ye’r baith proud and saucy, And no for a poor man’s wife; Gin I canna get a better I’se ne’er tak ane i’ my life. Out spake the bride’s sister, As she came in frae the byre; O gin I were but married, It’s a’ that I desire; But we poor fouk maun live single, And do the best we can: I dinna care what I should want; If I could get a man. Woo’d and married and a’,” etc. ------------------------------------------------------------------------ Scotland under Charles the First.