"Weel, I hear maist things; an' I was tellt that same nicht hoo at the denner-table Leddy Carline relatit the haill adventur', an' owned, fat was true aneuch, that the fush had fairly bestit her. Weel, amo' the veesitors at the Castle was the Dowager Leddy Breadanham; an' it seemed that whan Leddy Carline was through wi' her narrateeve, the dowager be tae gie a kin' o' a scornfu' sniff an' cock her neb i' the air; an' she said, wha but she, that she didna hae muckle opingin o' Leddy Carline as a saumon fisher, an' that she hersel' didna believe there was a fush in the run o' Spey that she cudna get the maistery ower. That was a gey big word, min' ye; it's langidge I wadna venture for tae make use o' mysel', forbye a south-countra dowager. "Weel, I didna say muckle; but, my faith, like the sailor's paurot, I thoucht a deevil o' a lot. The honour o' Spey was in my hauns, an' it behuvit me for tae hummle the pride o' her dowager leddyship. The morn's mornin' cam, an' by that time I had decided on my plan o' operautions. By guid luck I fand the dowager takin' her stroll afore brakfast i' the floor-gairden. I ups till her, maks my boo, an' says I, unco canny an' respectfu', 'My leddy, ye'll likely be for the watter the day?' She said she was, so says I, 'Weel, my leddy, I'll be prood for tae gae wi' ye mysel', an' I'll no fail tae reserve for ye as guid water as there is in the run o' Spey!' She was quite agreeable, an' so we sattlit it. "The Duke himsel' was oot on the lawn whan I was despatchin' the ither fushin' folk, ilk ane wi' his or her fisherman kerryin' the rod. 'Geordie,' said his Grace, 'with whom will you be going yourself?' 'Wi' the Dowager Leddy Breadanham, yer Grace!' says I. 'And where do you think of taking her ladyship, Geordie?' speers he. 'N'odd, yer Grace,' says I, 'I am sattlin in my min' for tae tak' the leddy tae the "Brig o' Fochabers" pool;' an' wi' that I gied a kin' o' a respectfu' half-wink. The Duke was no' the kin' o' man for tae wink back, for though he's aye grawcious, he's aye dignifeed; but there was a bit flichter o' humour roun' his mou' whan he said, says he, 'I think that will do very well, Geordie!'