That willeth to be kinges peres, 125 And hygher than the emperour; Some that were but pore freres Now wollen waxe a warryour. God is nat hir governour, That holdeth no man his +peragall; 130 Whyl covetyse is hir counsaylour, All such falshed mot nedë fall. That hye on horse willeth ryde In glitterand golde of grete aray, I-paynted and portred all in pryde; 135 No commun knight may go so gay. Chaunge of clothing every day, With golden girdles grete and small; As boystous as is bere at bay; All such falshed mot nedë fall. 140 With prydë +punysheth the pore, And somë they sustayn with sale; Of holy churche maketh an hore, And filleth hir wombe with wyne and ale; With money filleth many a male, 145 And chaffren churches when they fall, And telleth the people a lewed tale; Such falsë faytours, foul hem fall! With chaunge of many maner metes, With song and solace sitting long, 150 And filleth hir wombë, and fast fretes, And from the metë to the gong; And after mete with harp and song, And ech man mot hem lordes call; And hotë spyces ever among; 155 Such falsë faytours, foul hem fall! And myters mo than oon or two, I-perled as the quenes heed; A staf of golde, and +perrey, lo! As hevy as it were mad of leed; 160 With cloth of gold both newe and reed, With glitterand +gown as grene as gall, By dome will dampnë men to deed; All suche faytours, foul hem fall! And Christes people proudly curse 165 With brode bokes, and braying bell; To putte pennyes in hir purse They woll sell both heven and hell; And in hir sentence, and thou wilt dwell, They willen gesse in hir gay hall; 170 And though the soth thou of hem tell, In greet cursinge shalt thou fall. That is blessed, that they blesse, And cursed, that they cursë woll; And thus the people they oppresse, 175 And have their lordshippes at full; And many be marchauntes of woll, And to purse penyes woll come thrall; The porë people they all to-pull, Such falsë faytours, foul hem fall! 180 Lordes motë to hem loute, Obeysaunt to hir brode blessing; They ryden with hir royall route On a courser, as it were a king; With saddle of golde glitt[e]ring 185 With curious harneys quayntly crallit, Styroppes gaye of gold-mastling; All suche falshed, foul befall it! Christes ministers +cleped they been, And rulen all in robberye; 190 But Antichrist they serven clene, Attyred all in tyrannye; Witnesse of Johns prophecye, That Antichrist is hir admirall, Tiffelers attyred in trecherye; 195 All suche faytours, foul hem fall!