THE fyrst day of ȝole have we in mynd, How God was man born of owre kynd; For he the bondes wold onbynd Of all owre synnes and wykednes. The secund day we syng of Stevene, That stoned and steyyd up even To God that he saw stond in hevyn, And crounned was for hys prouesse. The iij day longeth to sent Johan, That was Cristys darlyng, derer non, Whom he betok, whan he shuld gon, Hys moder der for hyr clennesse. The iiij day of the chyldren ȝong, That Herowd to deth had do with wrong, And Crist thei coud non tell with tong, But with ther blod bar hym wytnesse. The v day longeth to sent Thomas, That, as a strong pyller of bras, Held up the chyrch, and sclayn he was, For he sted with ryȝtwesnesse. The viij day tok Jhesu hys name, That saved mankynd fro syn and shame, And circumsysed was for no blame, But for ensample of meknesse. The xij day offerd to hym kynges iij, Gold, myr, and cense, thes gyftes free, For God, and man, and kyng was he, Thus worschyppyd thei his worthynes. On the xl day cam Mary myld, Unto the temple with hyr chyld, To shew hyr clen that never was fylyd, And therwith endyth Crystmes. XI. BLYSSID be that lady bryght, That bare a chyld off great myght, Withouten peyne, as it was right, Mayd mother Marye. Goddys sonne is borne, his moder is a maid, Both aftur and beforne, as the prophycy said, With ay; A wonder thyng it is to se, How mayden and moder on may be; Was there nonne but she, Maid moder Marye. The great lord of heaven our servant is becom, Thorow Gabriels stevyn, owr kynd have benom, With ay; A wonder thyng it is to se, How lord and servant on may be; Was ther never nonne but he, Born off maid Marye. Two sons togyther they owght to shyne bryght; So did that fayer ladye, whan Jesu in hir light, With ay; A wonder thyng is fall, The lord that bought fre and thrall, Is found in an assis stall, By his moder Mary. The shepherdes in her region thei lokyd into Heaven, Thei se an angell commyng down, that said with myld steven. With ay; Joy be to God almyght, And pece in yerth to man is dyte, Fore God was born on Chrismes nyght, Off his moder Marye.