The kyng from Eltham sone he nam, Hyse presoners with hym dede brynge; And to y^e Blake Heth ful sone he cam, He saw london with oughte lesynge. ‘Heill Ryall london,’ seyde our kyng, ‘Crist y^e kepe from euere care!’ And thanné zaf it his blessyng And preied to Crist that it well fare. _Wot ze right well that thus it was, Gloria tibi Trinitas._ The Mair hym mette with moche honour With alle y^e Aldermen with oughte lesyng; ‘Heyl,’ seide y^e Mair, ‘thou conquerour, The grace of God with the doth spryng: Heil Duk, Heil Prynce, Heil comely Kyng; Most worthiest Lord vndir Crist ryall, Heil rulere of Remes with oughte lettyng, Heil flour of knyghthood now ouer all.’ _Wot ze right well that thus it was, Gloria tibi Trinitas._ ‘Here is come youre Citee all Zow to worchepe, and to magnyfye; To welcome zow bothe gret and small, With zow euere more to lyue and dye.’ ‘Graunt mercy Sires,’ oure kyng ’gan say, And toward london he ’gan ryde; This was vp on Seynt Clementys day They welcomed hym on euery side. _Wot ze right well that thus it was, Gloria tibi Trinitas._ The lordes of Fraunce thei ’gan say then, ‘Jngelond is nought as we wene; Jt farith by these Englyssh men, As it doth by a swarm of bene: Jngeland is lik an hyve with jnne, There fleeres makith vs full evell to wryng, Tho ben there arrowes sharpe and kene, Thorugh oure harneys they do vs styng.’ _Wot ze right well that thus it was, Gloria tibi Trinitas._ To london Brygge thanne rood oure kyng, The processions there they mette hym ryght; ‘_Ave Rex Anglorum_,’ thei ’gan syng, ‘_Flos Mundi_,’ thei seide, ‘goddys knyght.’ To london Brigge whan he com right, Vp on the gate ther stode on hy A gyaunt, that was full grym of myght, To teche the Frensshe men curtesy. _Wot ze right well that thus it was, Gloria tibi Trinitas._ And at the Drawe brigge that is faste by, Two toures there were vp pight; An Antelope and a Lyon stondyng hym by, Above them Seynt George oure lady’s knyght. Be syde hym many an Angell bright, ‘_Benedictus_’ thei ’gan synge; ‘_Qui venit in nomine domini_, goddys knyght’ _Gracia Dei_ with zow doth sprynge.’ _Wot ze right well that thus it was, Gloria tibi Trinitas._”