In thir days, dwalled upon the Bass a man of God, Peden the Prophet was his name. Ye'll have heard tell of Prophet Peden. There was never the wale of him sinsyne, and it's a question wi' mony if there ever was his like afore. He was wild 's a peat-hag, fearsome to look at, fearsome to hear, his face like the day of judgment. The voice of him was like a solan's and dinnle'd in folks' lugs, and the words of him like coals of fire. Now there was a lass on the rock, and I think she had little to do, for it was nae place far dacent weemen; but it seems she was bonny, and her and Tam Dale were very well agreed. It befell that Peden was in the gairden his lane at the praying when Tam and the lass cam by; and what should the lassie do but mock with laughter at the sant's devotions? He rose and lookit at the twa o' them, and Tam's knees knoitered thegether at the look of him. But whan he spak, it was mair in sorrow than in anger. "Poor thing, poor thing!" says he, and it was the lass he lookit at. "I hear you skirl and laugh," he says, "but the Lord has a deid shot prepared for you, and at that surprising judgment ye shall skirl but the ae time!" Shortly thereafter she was daundering on the craigs wi' twa-three sodgers, and it was a blawy day. There cam a gowst of wind, claught her by the coats, and awa' wi' her bag and baggage. And it was remarked by the sodgers that she gied but the ae skirl. Nae doubt this judgment had some weicht upon Tam Dale; but it passed again and him none the better. Ae day he was flyting wi' anither sodger-lad. "Deil hae me!" quo' Tam, for he was a profane swearer. And there was Peden glowering at him, gash an' waefu'; Peden wi' his lang chafts an' luntin' een, the maud happed about his kist, and the hand of him held out wi' the black nails upon the finger-nebs--for he had nae care of the body. "Fy, fy, poor man!" cries he, "the poor fool man! _Deil hae me_, quo' he; an' I see the deil at his oxter." The conviction of guilt and grace cam in on Tam like the deep sea; he flang doun the pike that was in his hands--"I will nae mair lift arms against the cause o' Christ!" says he, and was as gude's word. There was a sair fyke in the beginning, but the governor, seeing him resolved, gied him his dischairge, and he went and dwallt and merried in North Berwick, and had aye a gude name with honest folk frae that day on.