“Edward sendis his sond, to France messengers, Frere Hugh of Malmcestre was a Jacobyn, & William of Gaynesburgh was a Cordelyn. Alle þise passid þe se, so com þe erle of Artoys In prison did þam be a seuenyght in Caleys. To Paris siþen þei cam, & þer fond þei þe kyng, þei letter forth þei nam, to trowe þer saying. þis letter of credence þei schewed in his present, Here no þe accordance, what þer sayng ment, Sir Hugh was a man of state, he said as I salle rede, ‘To Prince & to prelate men salle loute & drede, & for lorde dere his biddyng salle men do, To lesse & more in fere haf fayth & treuth also, & for our lord Edward, þat God him saue & se, We toke þis trauaile hard, his bode to bere to þe. He settes þe terme & stage bi vs, whan & why þat he has don homage for Gascoyn plenerley, In forward formed in pes, as was þer acordance, As ȝour ancestres ches of Inglond & of France þei mad a pes final after þer contek, þou has broken it alle, & don him many ille chek. Now at his last goyng, when he to Gascoyn went, Ȝe cette a certeyn þing, at ȝour boþe assent, & þat suld holden be, euer withouten ende, þou brak þat certeynte wickkedly & vnhende Ȝit he biddes þe se, how wrong þou wilt him lede, Bituex him & þe was mad a priue dede, Of Gascoyn certeyn was þat feffement, Forto feffe him ageyn in þat tenement. þi seisyn is well knowen þe days has þou plenere, To restore him his owen, he sent to þe duzepers As lawe wild & right, and couenant was in scrite. Ȝeld it, þou has no right, with wrong holdes it in lite, Ageyn alle maner skille, & ȝit þon ert so grefe. For whilom þon wrote him tille, & cald him in þi brefe, þi kynde, faythfulle & leale of Gascoyn noble duke, þerto þou set þi seal, þat right wilt þou rebuke. Neuer siþen hiderward suilk speche vnte him touched, Werfore our kyng Edward n þouht fulle well has souched. þou holdes him not þi man, no þing holdand of þe, Ne þe þinkes neuer for þan, to mak þe more feaute. Ne hopes to wynne þat land with dynt of douhty knyght Of God he claymes holdand & neuer of no right. At þis tyme is not els of Sir Edward to seye, Bot of Edmunde þat duellis with him als breþer tueye Forbi any oþer with him will hold & be, He is lord & broþer, he certifies þat to þe. þat no man in þis werlde he hifes so mykelle no dredis, Ne with him is none herd so mykelle may help at nedis, For he sees so well ȝour grete controued gile, Ageyn his broþer ilk dele compassed in a while, Reft him his heritage, sais on him felonie, He ȝeldes vp his homage, forsakis þi companie,