ðo herde Abraham stevene fro gode, newe tiding and selkuð bode: 'tac ðin sune Ysaac in hond and far wið him to siðhinges lond. and ðor ða salt him offren me, on an hil, ðor ic sal taunen ðe. (_Genesis and Exodus_, ll. 1285-1290. ab. 1250-1300.) "Abid! abid!" the ule seide. "Thu gest al to mid swikelede; All thine wordes thu bi-leist, That hit thincth soth al that thu seist; Alle thine wordes both i-sliked, An so bi-semed and bi-liked, That alle tho that hi avoth, Hi weneth that thu segge soth." (_The Owl and the Nightingale_, ll. 835-842. Thirteenth century.) Quhen þis wes said, þai went þare way, and till þe toun soyn cumin ar thai sa prevely bot noys making, þat nane persavit þair cummyng. þai scalit throu þe toune in hy and brak up dures sturdely and slew all, þat þai mycht ourtak; and þai, þat na defens mycht mak, fall pitwisly couth rair and cry, and þai slew þame dispitwisly. (BARBOUR: _Bruce_, v. 89-98. ab. 1375.) Ȝyf þou ever þurghe folye Dydyst ouȝt do nygromauncye. Or to the devyl dedyst sacryfyse þurghe wychcraftys asyse, Or any man ȝaf þe mede For to reyse þe devyl yn dede, For to telle, or for to wrey, þynge þat was don awey; ȝyf þou have do any of þys, þou hast synnede and do a mys, And þou art wurþy to be shent þurghe þys yche commaundement.[18] (ROBERT MANNING of Brunne: _Handlyng Synne_, ll. 339-350. ab. 1300.) Herknet to me, gode men, Wives, maydnes, and alle men, Of a tale þat ich you wile telle, Wo so it wile here, and þer-to duelle. Þe tale is of Havelok i-maked; Wil he was litel he yede ful naked: Havelok was a ful god gome, He was ful god in everi trome, He was þe wicteste man at nede, Þat þurte riden on ani stede. Þat ye mowen nou y-here, And þe tale ye mowen y-lere. At the beginning of ure tale, Fil me a cuppe of ful god ale; And y wile drinken her y spelle, Þat Crist us shilde alle fro helle! (_Lay of Havelok the Dane._ ll. 1-16. ab. 1300.)