"We were crackin’ as crouse as twa auld cronies, when he said: ’And noo, Jean, a word in yer lug. I had nae thocht when I cam’ up here I was gaun to meet an auld frien’. I cam’ to ask you and your man, will ye tak’ the Test. But I am no’ gaun to ask the question o’ ye. For the sake o’ the auld days, this hoose and they that live in it are safe, so far as Robert Grierson o’ Lag is concerned. But that is between you and me. Dinna be lettin’ your man or your dochter, the wee besom, consort wi’ the hill-men. The times are stern, and the King maun be obeyed. But ye can trust me that I will not do your hoose a mischief. Whaur’s your guid man?’ ’He’s oot on the hills wi’ the sheep,’ says I, ’but he will be back before lang,’ and I went to the door to look, and there he was comin’ doon the brae face. He had seen the troopers and I’m tellin’ ye he was gey scared. I waved to him to hurry, and he, thinkin’ that I was in danger, cam’ rinning. ’Come awa ben the hoose,’ says I. ’There’s an auld frien’ o’ mine come to see us,’ and I brocht him in, and presented him to Lag. "Lag was gey ceevil to him, and said naething aboot oaths or tests, but talked aboot sheep and kye, and syne said: ’And noo I’ll ha’e to be awa’. I will tak’ anither sup o’ your buttermilk, Jean,’ and then he shook me by the haun’ and would ha’e shaken Andra’s tae, but Andra wadna tak’ a haun’ that was stained wi’ innocent blood. It was an affront to Lag, but a man like that aye respects anither man wi’ courage, and he walked oot o’ the door. He sprang into the saddle and the troop formed up and clattered doon the loanin’, and the last I saw o’ Lag he had turned his heid and was wavin’ his haun as he gaed roond the corner at the brae-fit." "And what of Mary," I said. "What was she doing in the meantime?" Her mother laughed. "We looked high and low for her and at last we found her in a hidie-hole in the haystack, greetin’ like a wean. She had made up her mind, puir lassie, that Lag would shoot baith her faither and me, because she had boxed his lugs." "And have you had no trouble since?" I asked, for I knew that the promise given by Lag would be binding on none but himself, and should a troop Captain like Winram or Claver’se come to Daldowie, disaster might fall on the household. "Oh, ay," she said, "we’ve seen Lag mair than aince since then. He was here twa or three weeks sin’ when you were lyin’ up in the laft, and he asked aboot you. He speired whether we had seen ocht o’ a young man in a trooper’s uniform wanderin’ aboot the moors. Ye were up in the laft sleepin’ as cosy as a mowdie, but I telt him I’d seen nae young man in ony trooper’s uniform. I wasna fule enough to tell him that I’d seen a trooper in the meenister’s claes. ’Weel,’ he said, ’should ye see sic an ane, dinna forget there’s a price upon his heid. He is a deserter, and Rab Grier mak’s short work o’ deserters.’