Holo mai la o Laamaikahiki, me kana mau kahuna, a me na kanaka i holo pu aku me Kila, a ma ia holo ana, i ke kokoke ana aku i Kauai, ia manawa hookani ae la o Laamaikahiki i ka pahu. Ia manawa lohe ae la o Moikeha i ka leo o kana pahu, alaila manao ae la oia, ua holo aku o Laamaikahiki me kona kaikaina. Ia manawa hoomakaukau ae la o Moikeha i ka aina a me ka hale, no ka hiki aku o ke alii Laamaikahiki. A hiki aku la o Laamaikahiki me Kila, lilo ae la o ua Laamaikahiki nei ma ka lima o ke kahuna nui o Kauai o Poloahilani, a hoihoi ia aku la i loko o ka heiau, me kona akua o Lonoikaoualii. Ua oleloia, na Laamaikahiki i lawe mua mai ke akua ma Hawaii nei. Noho iho la o Laamaikahiki ma Kauai, a mahope, holo aku la ma Maui a noho ma Kahikinui. Ua kapaia aku ia wahi mamuli o ko Laamaikahiki inoa. A no ka makani o ia wahi, haalele aku la o Laamaikahiki ia laila, holo aku la a ma ka aoao komohana o Kahoolawe. A malaila kahi i noho ai a hiki i kona manawa i hoi aku ai i Tahiti. Ua olelo ia no ka holo ana o Laamaikahiki i Kahoolawe, ka mea i kapaia ai ka moana ma ke komohana o Kahoolawe, “o Kealaikahiki”. Noho iho la o Laamaikahiki ma Kahoolawe, a no ka pono ole o ka manao o na kahuna, nolaila haalele ai o Laamaikahiki ia Kahoolawe, a hoi aku la i Kauai; a make o Moikeha, ili iho la ka aina ia Kila, hoi aku la o Laamaikahiki i Tahiti. MOKUNA IV. KA NOHO ALII ANA O KILA, AME KA HUAHUA ANA O KONA MAU KAIKUAANA. Mahope iho o ko Moikeha make ana, laweia aku la kona kupapau ma ka pali o Haena, a hiki i ka manawa a Kila i hoihoi ai i Tahiti. Ia manawa mahope iho, noho iho la o Kila ma ko Moikeha noho ana, e like me ka makemake o kona makuakane, a me kona mau makuahine, a me ka makuakane o na makuahine. A ma ia lilo ana o Kila i alii no Kauai e like me ka noho ana o kona makuakane, aka aole nae i maikai loa kona noho alii ana, no ka mea, ua huahua ae la kona mau kaikuaana, no ka lilo ana o Kauai ia Kila. Aka, ua huipuia ko lakou inaina me ko lakou hoomauhala mua ana, no ko Kila holo ana i Tahiti. A i ka hiki ana o kekahi hana nui ma o ke alii la, nolaila, olelo aku la oia i kona mau kaikuaana; aka, aole e hiki i na kaikuaana ke hoolohe aku ma ka Kila mea e kamailio aku ai. Aka aole i pono iki ko Kila noho alii ana ma ia manawa. A no ia mea, noonoo nui iho la na kaikuaana i mea e nalo ai ko lakou huhu i ko lakou kaikaina; nolaila, kukakuka ae la lakou ma ke kaawale, a hooholo iho la; penei lakou i hai aku ai i mua o Kila i ka lakou mea i hooholo ai, he mau manawa loihi mahope mai o Moikeha: “E Kila; e pono paha e kii kakou i na iwi o ko kakou makuakane, e hoihoi mai, a nau e lawe aku i Tahiti.” A ike iho la o Kila he pono ka manao o na kaikuaana, nolaila ae aku la oia mamuli o ko na kaikuaana manao. Aka, o ko Kila manao mua no ia i manao mua ai me kona mau makuahine.