A o na kanaka hoi i hoi malu ai i ka po, na hoewaa i holo pu mai me Kaialea, a me kekahi kanaka i hoouna hopeia mai e Hooipoikamalanai, hoi aku la lakou a hiki i Kauai; ninau mai la o Hooipoikamalanai: “Auhea hoi ko oukou nui?” I aku la lakou: “I mai oukou-e, he pono keia hoi ana mai nei, aole paha he pono. O Kaialea, aia ke paa la i loko o Pakaalana, a o ka poe hou ae nei hoi, ke paa pu la lakou, aole i ikeia ko lakou ola; ina no i make la, make mai la no. Na ke akua ko lakou ola, ke ola mai o nei mau la.” A lohe ae la o Hooipoikamalanai laua o Hinauu i keia mea, kaumaha loa iho la ko laua naau. I iho la laua: “He mea kupanaha, ke uhai mai nei ka ponalo ia kaua; alua paha auanei keiki a kaua e make. E pono no paha ia kaua ke hele luahine i ka moana a ike aku i kahi i waiho ai na iwi o ka kaua keiki, a make aku kaua ma kahi e make ai o ka kaua keiki. O ahaina kaua ke hele a make aku, aole o kaua ua loihi ko kaua mau la.” A no ia manao paa o Hooipoikamalanai e holo i Hawaii, lawe ae la laua i mau hoa holo no laua a nui, i mau moepuu e make pu aku ai me Kaialea. Ua manewanewaia ke poo o na kanaka a me Hooipoikamalanai ma. Ia holo ana aku a lakou nei a hiki ma Waipio, o ka la no hoi ia, a kekahi la ae kauila ka heiau, ka la i manaoia ai o Kaialea e kau ma ka lele. A hiki aku la lakou, ike ia mai la hookahi kaulua e kau ana ka puloulou alii. Ia wa ike aku la o Kila i na makuahine a me na kaikuaana o ia nei, nolaila, hoolale ae la o Kila e hoomakaukau na hale. Alaila kiiia aku la o Hooipoikamalanai laua o Hinauu a hoonohoia ma ka hale alii o Kunaka ma Pakaalana. A o na kaikuaana hoi o ia nei, hoonohoia aku la lakou ma ka hale e. Hoomanawanui ae la o Kila i ke aloha o kona mau makuahine, a uumi iho la i ke aloha, hele aku la ma ka wai e auau ai i mea e nalo ai kona uwe ana. Aka o Hooipoikamalanai ma, ua hoohewahewa loa ae la laua ia Kila, no ka mea, ua hookanaka makua ae la. A pau ka uwe ana a Kila maloko o ka wai, hoi aku la a halawai pu me kona mau makuahine, me kona huna ana ia ia iho. I aku la o Hooipoikamalanai ma: “Ke makemake nei maua e hoihoi mai i ka maua mau keiki ma kahi hookahi e noho pu ai, no ka mea, aole o maua makemake e kaawale aku ma ka hale e.” Nolaila, kiiia aku la na kaikuaana o Kila, a noho iho la ma kahi hookahi me ko lakou mau makuahine.