22. God spede, dere wife, how fayre ye? 190 _Vxor._ Now, as euer myght I thryfe, the wars I thee see. Do tell me belife where has thou thus long be? To dede may we dryfe, or lif, for the, For want. When we swete or swynk, 195 Thou dos what thou thynk, Yit of mete and of drynk Haue we veray skant. 23. _Noe._ Wife, we ar hard sted with tythyngis new. _Vxor._ Bot thou were worthi be cled in Stafford blew; 200 For thou art alway adred, be it fals or trew, Bot God knowes I am led, and that may I rew, Full ill; For I dar be thi borow, From euen vnto morow 205 Thou spekis euer of sorow; God send the onys thi fill! 24. We women may wary all ill husbandis; I haue oone, bi Mary that lowsyd me of my bandis! If he teyn, I must tary, how so euer it standis, 210 With seymland full sory, wryngand both my handis For drede. Bot yit other while, What with gam and with gyle, I shall smyte and smyle, 215 And qwite hym his mede. 25. _Noe._ We! hold thi tong, ram-skyt, or I shall the still. _Vxor._ By my thryft, if thou smyte, I shal turne the vntill. _Noe._ We shall assay as tyte. Haue at the, Gill! Apon the bone shal it byte. _Vxor._ A, so, Mary! thou smytis ill! 220 Bot I suppose I shal not in thi det Flyt of this flett! Take the ther a langett To tye vp thi hose! 225 26. _Noe._ A! wilt thou so? Mary! that is myne. _Vxor._ Thou shal thre for two, I swere bi Godis pyne! _Noe._ And I shall qwyte the tho, in fayth, or syne. _Vxor._ Out apon the, ho! _Noe._ Thou can both byte and whyne With a rerd; 230 For all if she stryke, Yit fast will she skryke; In fayth, I hold none slyke In all medill-erd.