sholde all be dede, to thende that their martyrdom and passyon myght be the cause of theyr salvacion and purgyng of theyr synne. For anone after the thyrty thousand sarasyns cam that were in the second batayl upon the frenssh men soo impetuously that they were al dede and slayn. Except Roulland, Baulduyn and Thyerry, the other were slayn and dede with speres, some flayn, some rosted, and other quartered, and submysed to many tormentes. And whan thys discomfiture was doon, Ganellon was with Charles, and also tharchebysshop Turpyn, whych knew nothyng of this werke so sorouful, sauf onely the traytre, whyche supposed that they had al ben destroyed and put to deth. Of the languysshe that was comynge to Charles he wyst not how sone it was comynge. “_OF the deth of kyng Marforius, and how Roulland was hurt wyth four speres mortally, after that al his peple were slayn. Capitulo_ii. “The bataylle as I have sayd tofore was moche sharpe. Whan Roulland, which was moche wery, retourned, he encountred in hys waye a sarasyn moche fyers, and blacke as boylled pytch and anone he toke hym at thentre of a wode, and bonde hym to a tree straytely, wythoute doyng to him any more harme, and after took and rode upon a hylle for to see the hoost of the sarasyns, and the crysten menne that were fledde, and sawe grete quantyte of paynyms. Wherefore anone he sowned and blew his horne of yvorie moche lowde. And wyth that noyse came to hym an hundred crysten men wel arayed and habylled wythoute moo. And whan they were come to hym, he retorned to the sarasyn that was bounde to the tree. And Roulland helde his sword over hym, saying that he shold deye, if he shewed to hym not clerely the kyng Marfuryus, and yf he so sholde do, he sholde not deye. The sarasyn was content, and sware that he sholde gladly do it for to save hys lyf, and soo he brought hym with hym unto the place where they sawe the paynyms, and shewed to Rolland whyche was the kynge, whych rode upon a redde hors, and other certayn tokenes. And in thys poynt, Roulland reconfermed in hys strengthe, trustying veryly in the myght of God, and in the name of Jhesus, as a lyon entred into the bataylle, and emonge them he encountred a sarasyn, whych was gretter than ony of the other, and gaf to hym so grete a stroke wyth Durindal his swerde upon the hede, that he cleft hym and hys hors in two partes, that the one parte went on one syde, and that other on the other syde. Wherefore the sarasyns were soo troubled and abasshed of the myght and puissaunce of Rolland, that they alle fled tofore hym, and then abode the kyng Marfuryus wyth a fewe folke. Thenne Rolland sawe thys kynge. And wythout fere came to hym and putte hym to deth incontynent. And alle the hondred crysten men that were wyth Roulland in thys rencountre were dolorously slayn and put to deth, except onely Baulduyn and Thyerry, whych for fere fled into the wode. But after that Rolland had slayn kyng Marfuryus, he was sore