O quam mire Jesu ludis His quibus diligeris! Sed cum ludis non illudis, Nec fallis nec falleris, Sed excludis quos includis Notus non agnosceris. Gloria et honor tibi, Spes, vita, lux animae, Per quem sperant se proscribi Libro mortis pessimae, Praestent sibi nos ascribi Peccatricis lacrymae. AD LAUDES. O Maria noli flere, Jam non quaeras alium, Ortolanus hic est vere Et colonus mentium, Intra mentis ortum quaere Mentis operarium; Unde planctus et lamentum? Quid mentem non erigis? Quid revolvis monumentum? Tecum est quem diligis; Jesum quaeris, et inventum Habes, nec intelligis. Unde gemis? unde ploras? Verum habes gaudium, In te latet quod ignoras Doloris solatium, Intus habes, quaeris foras Languoris remedium. Jam non miror si nescisti Magistrum dum seminat, Semen, quod est verbum Christi Te magis illuminat, Et Rabboni respondisti Cum Mariam nominat.[5] Gloria et honor Deo, Cujus profert gratia Invitanti Pharisaeo Mariae suspiria, Coenam vitae qui dat reo Gratiae post prandia. ---------- [5] Pedes Christi quos lavisti Fonte lota gratiae, Quem ab ipso recepisti Funde rorem veniae, Resurgentis quem vidisti Fac consortes gloriae. IN TRANSFIGURATIONE DOMINI. Coelestis formam gloriae, Quam spes quaerit Ecclesiae, In monte Christus indicat, Quo supra solem emicat. Res memoranda saeculis; Hic cum tribus discipulis Cum Moyse et Helia Grata promit eloquia. Assistunt testes gratiae Legis atque prophetiae, De nube testimonium Sonat Patris ad Filium. Glorificata facie Christus claret hodie, Queis sit honor credentium Deo pie fruentium. Visionis mysterium Corde levat fidelium, Unde solenni gaudio Clamat nostra devotio. Pater cum Unigenito Et Spiritu Paraclito Unus nobis hanc gloriam Largire per praesentiam. AD MATUTINUM. O sator rerum, reparator aevi, Christe, rex regum, metuende censor, Ad preces nostras pariterque laudes Aspice gratis. Noctis incursu tibi vota laudum Pangimus, praesta tibi sint ut apta. Nosque concentu refove perennis Luminis auctor. Inter Heliam Moysenque vates, Ut jubar solis faciem refulgens, Candida veste nivis instar albae Tu micuisti. Tu Dei Patris Patre teste proles Cum sis sanctorum decus angelorum Tu salus mundi, via, vita, virtus Crederis esse. Gloria, virtus sit tibi Creator, Cuncta qui solus retinens gubernas. In throno regni sine fine regnans Trinus et unus. AD LAUDES. O nata lux de lumine, Jesu redemptor saeculi, Dignare clemens supplicum Laudes precesque sumere. Qui carne quondam contegi Dignatus es pro perditis, Nos membra confer effici Tui beati corporis.