"I paid the men as ye tellt me, and syne I gaed doun to my cousin’s shop i’ the Rope-Walk, just to speir if they were a’ weel; and then I cam’ back to the inn, thinking to get a bit quiet gless a’ by mysel’ i’ the chimley corner. But when I gaed into the room I fand it filled wi’ muckle sodger folk, drinking and sweering like deevils. And the first man I clappit eyes on was yin Jock Cadder, whae was yince a freend o’ mine, so sitting doun aside Jock, I fell into crack. "Weel, I hadna been there mony meenutes when I hears a loud voice frae the ither end calling for a song. And anither voice answered, no sae loud, but weak and thin. I jumpit up in my seat, for the voices were weel kenned to me. And there I saw at the ither end o’ the table your wanchancy cousin the Captain, sitting glowrin’ wi’ his muckle een and playing wi’ his gless. And aside him was nae ither than Maister Michael Veitch, him o’ Dawyck, but no like what he used to be, but a’ red aboot the een, and fosy aboot the face, like a man that’s ower fond o’ the bottle." My heart leaped with a sudden terror at the news. What on earth was Marjory’s brother doing on the Pier o’ Leith in the company of my most bitter foe? A great sense of coming ill hung over me as Nicol went on. "Weel, I was astonished; and speaking quiet in Jock Cadder’s ear, I asks him what it meant, and what the twae were daein’ here. And this is what I heard from him, for Jock never jaloused I had aught to dae wi’ ye, but thocht I was aye the same auld hide-i’-the-heather I had been afore. ’When our Captain cam back frae furrin pairts,’ says he, ’he gangs off to Tweeddale, your ain countryside, for it seems there’s a lassie there he’s awfu’ fond o’. She’s the dochter o’ auld Veitch o’ Dawyck, rich, and, by a’ accoont, terrible bonny. But she’s trysted to the Captain’s cousin, Burnet o’ Barns, whae has been in Holland for mair nor a year. It’s weel kenned that Maister Gilbert Burnet, when he gets a ploy intil his heid, never stops till he wins his purpose; so he sets himsel’ to mak love to the lass. And he couldna dae this unless he were weel in favour wi’ her brother Michael, so he begins by winnin’ him ower to his side. Noo Michael Veitch (that’s him up there) was aye uncommon fond o’ wine and yill o’ a’ description, so the Captain leads him on and on by drinkin’ wi’ him at a’ times, till noo the man is fair helpless. But this wasna a’, for if John Burnet cam hame and fund this gaun on, he wad mak a rare camsteery, and, by a’ accoont, he’s a stieve dour chiel. So Maister Gilbert, whae’s high in favour wi’ the Privy Council, gangs and tells them o’ some daeings o’ his cousin’s abroad, o’ some hobnobbing and plotting wi’ rebels and outlawed folk, and sending treasonable letters to this land under his name; so he gets a warrant for the lad’s arrest as sune as he sets foot on Scots earth—and a’body kens what that means, that he’ll no be troubled muckle mair wi’ his cousin in this warld.