"When you had gone oot," began Nicol, "I just waited till I heard your footsteps gang oot o’ the yaird. Syne I gaed dounstairs to the landlord, whae is a decent, comfortable kind o’ man wi’ no muckle ill aboot him. I telled him that my maister was terrible unweel, and on no accoont maun be disturbit, but that he maun hae the room to himsel’ for the nicht. The man was verra vexed to hear aboot ye. ’Sae young a chiel,’ says he, ’it’s awfu’.’ So I got my will, and I kenned I wad be troubled by nae folk comin’ and speirin’ aboot the place. There was nae reason why I shouldna gang awa’ and leave the lawin’, but I had a kind o’ irkin’ to get anither glisk o’ the sodgers, so I e’en gaed into the room aside them. "They were noo mair uproarious than afore. Nane were drunk, for ’faith, the Captain wasna the man to let his men dae that, but a’ were geyan wild and carin’ little aboot their language. The Captain sits at the heid o’ the table sippin’ his toddy wi’ that dour stieve face o’ his that naething could move, and that ye think wad be ashamed to sae muckle as lauch. But Maister Veitch wasna like him. He was singin’ and roarin’ wi’ the loudest, and takin’ great wauchts frae the bowl, far mair than was guid for him. "By and by he gets up on his feet. "’A health to the Captain,’ he says. ’Drink, lads, to the welfare o’ that most valiant soldier and gentleman, Captain Gilbert Burnet. Ye a’ ken the errand ye’re come on, to lay hands on a rebel and take him to his proper place, and I drink to your guid success in the matter.’ And he lifts up his glass and spills some o’ it ower the table. "At this there was a great uproar, and they a’ rose wi’ their glasses and cried on the Captain. He sat a’ the while wi’ a sort o’ scornfu’ smile on his face, as if he were half-pleased, but thocht little o’ the folk that pleased him. "’I thank you,’ he says at last. ’I thank you all, my men, for your good will. We have done well together in the past, and we’ll do better in time to come. I will prove to the rebel folk o’ this land that Gilbert Burnet will make them obey.’ "’Faith, Gilbert,’ says Maister Veitch, ’hae ye no the grace to speak o’ your verra guid friend? I think ye’re beholden to me for a hantle o’ your success.’ "The Captain looks at him wi’ a glint o’ guid humour. ’No more, Michael,’ says he, ’than the cook owes to the scullion. You do my dirty work.’ "’Dirty work, quotha,’ cried Maister Veitch, who was hot and flustered with wine. ’I wouldna tak that from any other than yoursel’, Gilbert, and maybe no from you.’ "’Take it or not, just as you please,’ said the Captain, scornfully. ’It’s no concern o’ mine.’ "This angered the other, and he spoke up fiercely: "I am of as guid blood as yoursel’, Gilbert Burnet. Is a Tweeddale gentleman no as guid as a bit westland lairdie?"