"At first baith fought nane sae bad, for baith were braw swordsmen, and even in sic a plight Michael’s skill didna desert him. Gilbert, too, was quieter than was to be expectit. But of a sudden a wild fury seized him. ’I’ll teach ye to speak ill o’ me and my house,’ he cried in a voice like thunder, and cam on like a storm o’ hail. "Michael fell back and tried to defend himsel’. But the puir lad was sae dazed and foundered that frae the first he had nae chance. His blade wabbled at every guaird, and he never risked a cut. It was just like a laddie gettin’ his paiks frae a maister and keepin’ off the clouts wi’ yae airm. "And then he let his sword drop, whether wi’ weariness or no I canna tell, and stood glowrin’ afore him. The Captain never stopped. I dinna think he ettled it, for when he began I think he didna mean mair than to punish him for his words. But now he lunged clean and true. Nae sword kept it aff, nae coat o’ mail wardit it, but deep into Michael’s breast it sank. Wi’ yae groan he fell back, and the breath gaed frae his body. "I could hardly contain mysel wi’ rage and sorrow. At first I was for rinnin’ forrit and throttlin’ the man, but I got a glimpse o’ his face, and that keepit me. It was dark as a thunder-clud, and regret and unquenched anger lookit oot o’ his een. "’This is a black business,’ he says to himsel’, ’a black damnable business. God knows I never meant to kill the fool.’ And he began to walk up and down wi’ his heid on his breast. "I felt that I had seen eneuch. My whole hert was sick wi’ the peety o’ the thing, and forbye it was time for me to be going if I was ever to win to Tweedside. So I slips frae the house, which was still quiet, for naebody kenned o’ the deed, and far away somewhere I heard the lilt o’ a sodger’s song. I sped doun the Harbour Walk and syne into Embro’, as though the deil were ahint me. When I won to Auchendinny it was aboot three in the mornin’, and I made a’ the haste I could. I think I maun hae run a’ the road frae there to Leidburn. Then I took ower the Cloch hills and doun by Harehope and the Meldons. I crossed Lyne abune the Brig, and came doun Stobo burn, and here I am. I never met a soul for good or ill, so the land’s quieter thereaways than folk make it oot. But doun by the Eddleston Water there’s a geyan nest o’ sodgers, so ye’ve nae time to lose, Laird, if ye wad win to the hills." When I turned to Marjory at the close of this tale she was weeping silently; yet there was little bitterness in her tears. Her brother had, after all, made a better end than one could have guessed from his life. Indeed, I had small cause to feel kindness to him, for he had betrayed his trust, and had been the author of all the ills which had come upon my mistress. But for her sake I was sad.