_Goodwife._ A wow na, John, the daft loons will laugh at you, and she’ll think shame, gang ye out by, and she’ll speak to you through the gavel window. Out goes John, and the bride, and her twa sisters goes to the window within to hear the diversion, and what he would say. Now says John, Girzy my dear, my braw pretty woman, an ye be in earnest, tell me, for by my suth I’m no scorning. _Girzy._ Indeed, John, I’m very willing to tak ye, but ye needna tell every body about it. _John._ Then gie me a kiss on that. He shoves his head in at the window, making a lang neck to win down to her, and she stood on a little stool to win up to him. O, cries he, an ye were good flesh I could eat you a’, I like you sae weel; it’s a pity there is sic a hard wa’ between us, I’se tell my mither sae bonny as ye are: O, gie me anither kiss yet, and then I’ll go. One of her sisters standing by in a dark corner, gets haud o’ a cow’s head, which wanted a’ the skin but about the mouth, and shoves it towards his mouth, which he kissed in the dark. O, cries he, your mouth be cauld since I kissed ye last, and I think ye hae a beard, I saw nae that before, or is’t wi’ spinning tow that maks your mouth sae rough at e’en. Hame he comes, and tells his mither the speed and properties of the marriage. All things was got ready, and next week Sleeky Willie the weaver and him came to gree the marriage, and stay all night with the bride, and teach John good manners, for when John was hungry, he minded his meat mair than his good behaviour, and he never was fu’ till the dish was tume. Willie the weaver was to tramp on his fit when he thought he had suppet aneugh; so all things being agreed, upon short and easy terms, and the wedding day set, they were to be three times cried on Sunday, and quietly married on Monday, neither piper nor fiddler to be employ’d, but sweith awa hame frae the Minister, and into the bed amang the blankets; ha, ha, cried John, that’s the best o’t a’.