“Christell the thryd succedit to Christell the secund, his father, in the tyme of Williame Wallace; quhilk Christell was efter maid knycht be King Robert Bruce, and for his monye gude actis done againis the Inglismen, was callit Gud S^r Christell. Quha quhen King Robert Bruce was tane presonare in handis be the Inglismen at ane feild besyde Methven, and thay that tuke him cryit in scorne and derisioun, Quha will help the new maid King? quhilk cry the said S^r Chrystell hard, and come in all haist and straik at erd him that had the king in handis; and thair he and his freindis reskewit the said King Robert, and pat him to libertie. This Chrystell maryit the said King Robert Bruce sister, and thairfor the said King Robert gaif to the said S^r Chrystell the dowbil tresour of flour de lycis, to be worne about his armes and the armes of his posterité, lyk as the King weris thame. Efter mony grit and notabill actis done be the said S^r Chrystell contrair Ingland, he was tane at the last, and had to Londoun, and thair put to deid in maist cruell maner. In this mene tyme, King Robert Bruce hapnit to be in the toun of Dunfreis, and passand furth till ane lytill knoll besyd the said toun to tak the air, quhair the word and tythingis come to him of the crewell slauchter of the said S^r Chrystell, quhilk the king heirand maid grit lamentatioun wyth sum teiris, saying, It is ane pieté that sa nobill ane knycht suld die sa crewell ane deid. And incontinent, in the samin place quhair he wes standand quhen the tythingis come to him, gart found ane chapell in honour of the Virgene Marie; and in remembrance of the said S^r Chrystell foundit ane preist to do devyne service thairin perpetuallie, and pray for the said Schir Chrystell; and gaif to the said preist and his successouris the sowme of fyve pundis Streviling, to be tane of the baronie of Carlauerok, for thair sustentatioun. Quhilk fundatioun I haue had oft in my handis, and red it sindrie tymes. The quhilk chapell was standand haill and vndecayit in the yeir of God J^m v^c lii yeiris, as I saw my self; and as I beleve standis yit in the samin maner, and is callit be all the inhabitaris in that cuntre Christallis chapell. “ANE EIK OF S^R CHRISTOPHER OF SETOUN, THE THRID OF THAT NAME. “It is to wit that efter that I had wryttin the Historie of the Hous of Setoun, I haue fund in the greit Cronicles of Ingland, set furth sen I wret the historie of Setoun, quhilk ar as efter followis: