"Havers!" said Mistress McAlister, "ye are an auld eneuch man to ken that ye canna blaw twice in my lug wi' the same flairdies. Ye forget I hae heard ye at that job before. And it lasted--hoo lang? Just e'en till your company rade awa' frae Girvan to Kirkcudbright, and then ye took up with Maggie Nicholson, the byre-lass o' Bombie, the very second week that ever ye were there! And telled her, I dare say, that she was weel-faured, blithe, and a bonny woman!" "I see ye haena forgotten how to belie them that ye tried to break the hearts o', Bess Landsborough," said Scarlett, without, however, letting his broken heart interfere with a very excellent appetite. "Ye weel ken that ye sent me frae the door o' the Laggan wi' my tail atween my legs like a weel-lickit messan, and twa o' your ill-set cronies lookin' on at my shaming, too." "I'm thinkin', my man John," retorted Bess Landsborough, "that ye had better say as little as ye can aboot that ploy. For the lasses were Mirren Semple o' the Auld Wa's and Meg Kennedy o' Kirriemore, that had come in the afternoon to keep me company. And as we sat talking ower ae thing after anither, we spak' amang ithers o' you, my braw trooper--Sergeant John Scarlett, no less, that rode so gallantly with the colors in his hand. And by this and that we had it made clear that ye had been for making up to a' the three o' us at once! An' so we compared your tricks. How ye had gotten doon on your knees and telled us that ye loved us best o' a' the world. Ye had kissed oor hands--at least, mine and Meg Kennedy's. But your favorite fashion was to take the skirts o' oor gouns and kiss the hem o' them, swearin' that ye wad raither kiss the border o' oor cloaks than the mouth o' the grandest woman in Scotland. (A' the three o' us!) Then ye asked for a curl cut off aboon our brows--at least, frae mine and Mirren Semple's. For Meg Kennedy never had sic a thing in her life, but had aye flat, greasy hair, sleekit like a mowdiewart[D] hingin' by the neck in a trap on a wat day. And her ye telled that ye couldna bide hair that wadna keep smooth, but was aye a'kinked and thrawn into devalls and curliewigs. Oh, sic a bonny, true-speakin', decent, mensefu' callant as the three o' us made ye oot to be! So when we had ye gye-and-weel through-hands, wha should ride up to the door but my gay lad himsel', this same braw cavalier. So Mirren and Meg and me, we gaed oot ontil the step and telled ye what we thocht o' ye. Ow aye, ye were a puir disjaskit cuif that day, Sergeant John Scarlett, for a' your silver spurs and your red sodjer's coat!" [D] Mole.