I answerit to him, that thair was na receipt culd serve aganis feir; and that he wald not be affrayit, in case he wer not culpabill; and that I answerit bot rudely to the doutis yat were in his letteris.[21] Summa, I maid him hald his toung. The rest were lang to wryte. Schir James Hammiltoun met me, quha schawit, that the uther tyme quhen he hard of my cumming, he departit away, and send Howstoun, to schaw him, that he wald never have belevit that he wald persewit him, nor yit accompanyit him with the Hammiltounis. He answerit, that he was only cum bot to see me, and yat he wald nouther accompany Stewart nor Hammiltoun, bot be my commandement. He desyrit[22] that he wald cum and speik with him. He refusit it. The Laird of Lusse,[23] Howstoun, and Caldwellis sone, with xl hors or thair about, came and met me. The Laird of Lusse said, he was chargeit to ane day of law be the King's father, quhilk suld be this day, aganis his awin handwrit, quhilk he has; and zit notwithstanding, knawing of my cumming, it is delayit. He was inquyrit to come to him, whilk he refusit, and sweiris that he will indure nothing of him. Never ane of that towne came to speik to me, quhilk causis me think that thay ar his; and nevertheless he speikis gude, at the leist his sone. I se[24] na uther gentilman but thay of my company. The King send for Joachim zisternicht,[25] and askit at him, quhy I lodgeit not besyde him, and that he wald ryse the soner gif that wer; and quhairfoir[26] I come, gif it was for gude appointment? and gif ye wer thair in particular? and gif I had maid my estait, gif I had takin Paris[27][28] and Gilbert to wryte to me? and yat I wald send Joseph away. I am abaschit [_i.e._ I wonder] quha hes schawin him sa far; zea, he spak evin of ye marriage of Bastiane. I inquyrit him of his letteris, quhairintil he plenzeit {complained} of the crueltie of sum; answerit, that he was astonischit,[29] and that he was sa glaid to se me, that he belevit to die for glaidness. He fand greit fault that I was pensive. I departit to supper. This beirer will tell zow of my arryving. He prayit me to returne; the quhilk I did. He declairit unto me his seiknes, and that he wald mak na testament, but only leif all thing to me; and that I was the caus of his maladie, becaus of the regrait that he had that I was sa strange unto him. And thus he said: Ze ask me quhat I mene be the crueltie contenit in my letter? It is of zow alone that will not accept my offeris and repentance. I confes that I have failit, but not into that quhilk I ever denyit, and sicklyke hes failit to {too} sindrie of your subjectis, quhilk ze have forgevin.[30] I am zoung.