[The following document is here printed for the first time, so far as is known to the Editor. It is from a MS. at Blairs College, and is published by kind permission of the Right Reverend the Rector, and with the advantage of revision by the Reverend Professor Welsh. It is dated {158-}, and probably belongs to the last year of Queen Mary's life.] Cum Serenissima Regina Scotiae multis ab hinc annis in Anglorum haereticorum custodias sit inclusa atque ob id non possit Catholicae Ecclesiae sacramenta suscipere et rebus divinis praesertim vero missae sacrificio nisi clam et magno cum periculo interesse, supplex petit a Sanctissimo Domino Nostro quam diu in illa custodia retinetur, ut sacerdoti catholico suo capellano pro tempore existenti concedatur, facultas non modo exercendi omnia munera episcopalia exceptis ordinis et confirmationis sacramentis, et Chrysmatis consecratione; sed etiam absolvendi ab haeresi, et haereticos poenitentes gremio sanctae matris Ecclesiae reconciliandi; quod frequentes ibi se offerant huiusmodi occasiones. Deinde cum in hac rerum calamitate ipsi Reginae opus sit ad sua secreta consilia et commercia tractanda et exsequenda, uti opera nonnullorum Anglorum, qui nisi profanis haereticorum et schismaticorum precibus et communioni intersint, vel a praefectis carceris prohiberentur, ne Reginae inservirent, vel non possent ita commode illa consilia et commercia juvare; dignetur Sanctitas Sua sacerdoti capellano, quem Regina delegerit hanc potestatem illos ab omni censura et poena in tali casu absolvendi; et quoties opus fuerit in gratiam Sanctae matris Ecclesiæ reducendi; ii tamen, quoad fieri potest, vitare debent impiam huiusmodi communionem et rerum sacrarum prophanationem. Permittat quoque Sanctitas Sua, ut tales etiam ante absolutionem possint sine scrupulo tum Reginae tum sacerdotis celebrantis et aliorum qui missae intererunt, praesentes adesse in ea missa quae coram Regina, durante ejus captivitate celebrabitur. Petit etiam Regina, ut 25 numero viri catholici, per eam nominandi, quo commodius et securius ipsi inserviant, possint sine scrupulo et sine periculo et metu censurarum et peccati, hujusmodi precibus et communionibus hæreticorum interesse, ita tamen, ut cum illis non communicent, ac nefandis illorum actibus ne verbo quidem consentiant. Concedat quoque sua Beatitudo ipsi Reginæ plenam indulgentiam et remissionem omnium peccatorum in forma jubilei, quoties genibus flexis orat confessa coram sacra Eucharistia, vel eam suscipit, ac quoties patienter fert injuriam ab hæreticis sibi illatam; eam dem quoque obtineat indulgentiam in articulo mortis ore dicendo Jesus Maria vel idem corde saltem memorando. Postremo Regina summis precibus Sanctissimum Dominum Nostrum orat, ut quem sibi delegerit sacerdotem, possit ab eo in confessione sacramentali absolvi a cunctibus casibus etiam Sedi Apostolicæ reservatis, atque in bulla coenae Domini contentis.