Coupo santo, &c. D’uno raço que regreio Sian bessai li proumié gréu; Sian bessai de la patrio Li cepoun emai li priéu. Coupo santo, &c. Vuejo-nous lis esperanço E li raive dóu jouvènt, Dóu passat la remembranço E la fe dins l’an que vèn. Coupo santo, &c. Vuejo-nous la couneissènço Dóu Verai emai dóu Bèu, E lis àuti jouïssènço Que se trufon dóu toumbèu. Coupo santo, &c. Vuejo-nous la Pouësio Pèr canta tout ço que viéu, Car es elo l’ambrousio Que tremudo l’ome en diéu. Coupo santo, &c. Pèr la glòri dóu terraire Vautre enfin que sias counsènt, Catalan, de liuen, o fraire, Coumunien tóutis ensèn! Coupo santo E versanto, Vuejo à plen bord, Vuejo abord Lis estrambord E l’enavans di fort! A LA RAÇO LATINO. (PEÇO DICHO A MOUNT-PELIÉ SUS LA PLAÇO DÓU PEIROU, LOU 25 DE MAI DE 1878.) Aubouro-te, raço latino, Souto la capo dóu soulèu! Lou rasin brun boui dins la tino, Lóu vin de Diéu gisclara lèu. Emé toun péu que se desnouso A l’auro santo dóu Tabor, Tu siés la raço lumenouso Que viéu de joio e d’estrambord; Tu siés la raço apoustoulico Que sono li campano à brand: Tu siés la troumpo que publico E siés la man que trais lou gran. Aubouro-te, raço latino, &c. Ta lengo maire, aquéu grand flume Que pèr sèt branco s’espandis, Largant l’amour, largant lou lume Coume un resson de Paradis, Ta lengo d’or, fiho roumano Dóu Pople-Rèi, es la cansoun Que rediran li bouco umano, Tant que lou Verbe aura resoun. Aubouro-te, raço latino, &c. Toun sang ilustre, de tout caire, Pèr la justiço a fa rajòu; Pereilalin ti navegaire Soun ana querre un mounde nòu; Au batedis de ta pensado As esclapa cènt cop ti rèi ... Ah! se noun ères divisado Quau poudrié vuei te faire lèi? Aubouro-te, raço latino, &c. A la belugo dis estello Abrant lou mou de toun flambèu, Dintre lou mabre e sus la telo As encarna lou subre-bèu. De l’art divin siés la patrio E touto gràci vèn de tu; Siés lou sourgènt de l’alegrio E siés l’eterno jouventu! Aubouro-te, raço latino, &c. Di formo puro de ti femo Li panteon se soun poupla; A ti triounfle, à ti lagremo Tóuti li cor an barbela; Flouris la terro, quand fas flòri; De ti foulié cadun vèn fòu; E dins l’esclùssi de ta glòri Sèmpre lou mounde a pourta dòu. Aubouro-te, raço latino, &c. Ta lindo mar, la mar sereno Ounte blanquejon li veissèu, Friso à ti pèd sa molo areno En miraiant l’azur dóu cèu. Aquelo mar toujour risènto, Diéu l’escampè de soun clarun Coume la cencho trelusènto Que dèu liga ti pople brun. Aubouro-te, raço latino, &c.