sorwe and mischefe is to me nowe falle: for now am I pouer that somtyme was riche but nou haue I no frende ne kyn that me wolle dune eny goode. But whenne that I was riche alle men me honoured and worsheped and now euery man hath of me scorne and despite: And now I wote that Cordeil my yong doughter saide me treuthe whenne she saide as moche as I hadde so moche shulde I bene beloued. And alle the while that I hadde good tho was I beloued and honoured for my richesse: but my two doughteres me glosed tho and now of me thei setten litel price. And sothe [truth] tolde me Cordeil but I wolde nought belyve hit ne vnderstonde: And therefore I lete hire gone fro me as a thing that I sette litel price of and now wote I neuer what for to done sith my ij doughteres haue me thus deceyuede that I so moche louede. And nou mote I nedes sechen hire that is in another lande, tha lightely I lete hire gone fro me with oute eny rewarde of yiftes. And sheo said she loued me as moche as she aught hire fadre by al manere resonn: And tho I shulde haue axed of hire no more, and tho that me otherwise behighten thurgh hire fals speche nou haue me deceyued. In this maner Leir longe tyme him began to make his mone and at the laste he shope him to the see and passed ouer into Fraunce and axede and aspiede where the quene myghten bene founde and men tolde where that she was. And whenne he come to the cite that sheo was inne priuiliche be sente his squyer to the quene to telle here that hire fadere was comen to hier for grete nede. And whenne the squyer come to the quene be tolde hire euere dele of hire sustres fro the beginnyng vnto the ende. Cordeil the quene anone nome gold and siluer grete plente and toke hit to the squier in counsell that he shulde gone into a certeyn citee and him arrayen, bathen, and wesshen, and then come ayein to hire and bringe with him an honest companye of knyghtes, fourty atte the leste with hire mayne: and thanne he shulde sende to hire lorde the kyng and sein that he were comen for to speke with his doughter and him for to seen. And whenne the kyng and the quene herde that he come they hym receyued with mochel honour. The kyng of Fraunce tho lete sende thurgh alle his reame and comanded that al men to him shulde ben entendaunt to Lier the quenes fader in al maner of thing as hit were to himselfe. Whenne Lier hadde duelled their a monthe and more he tolde to the kyng and to the quene his doughter hou his tueyn eldest doughtres had him serued. Agampe anone lete ordeyne a grete hooste of Fraunce and sente hit into Brutaine with Leir, the quenes fader, for to conquere his lande ayein and his kyngdome. And Cordeill also come with hire fader into Brutaine for to haue the reame after heir fadres deth. And anone thei wente to shipp and passede the see and come into Brutaigne and foughten with the felons and ham scomfetede and quelde and Leir tho had his lande ayein and after leued iij yere and helde his reame in pees and afterward deid and Cordeil his