"I kenna," answered the blind woman; "I gat ill-will about it amang some o' our ain folk. They said I should hae been to him what Jael was to Sisera. But weel I wot I had nae divine command to shed blood, and to save it was baith like a woman and a Christian. And then they said I wanted natural affection, to relieve ane that belanged to the band that murdered my twa sons." "That murdered your two sons?" "Ay, sir; though maybe ye'll gie their deaths another name. The tane fell wi' sword in hand, fighting for a broken national Covenant; the tother,--oh, they took him and shot him dead on the green before his mother's face! My auld een dazzled when the shots were looten off, and, to my thought, they waxed weaker and weaker ever since that weary day; and sorrow, and heart-break, and tears that would not be dried, might help on the disorder. But, alas! betraying Lord Evandale's young blood to his enemies' sword wad ne'er hae brought my Ninian and Johnie alive again." "Lord Evandale?" said Morton, in surprise. "Was it Lord Evandale whose life you saved?" "In troth, even his," she replied. "And kind he was to me after, and gae me a cow and calf, malt, meal, and siller, and nane durst steer me when he was in power. But we live on an outside bit of Tillietudlem land, and the estate was sair plea'd between Leddy Margaret Bellenden and the present laird, Basil Olifant, and Lord Evandale backed the auld leddy for love o' her daughter Miss Edith, as the country said, ane o' the best and bonniest lassies in Scotland. But they behuved to gie way, and Basil gat the Castle and land, and on the back o' that came the Revolution, and wha to turn coat faster than the laird? for he said he had been a true Whig a' the time, and turned papist only for fashion's sake. And then he got favour, and Lord Evandale's head was under water; for he was ower proud and manfu' to bend to every blast o' wind, though mony a ane may ken as weel as me that be his ain principles as they might, he was nae ill friend to our folk when he could protect us, and far kinder than Basil Olifant, that aye keepit the cobble head doun the stream. But he was set by and ill looked on, and his word ne'er asked; and then Basil, wha's a revengefu' man, set himsell to vex him in a' shapes, and especially by oppressing and despoiling the auld blind widow, Bessie Maclure, that saved Lord Evandale's life, and that he was sae kind to. But he's mistaen if that's his end; for it will be lang or Lord Evandale hears a word frae me about the selling my kye for rent or e'er it was due, or the putting the dragoons on me when the country's quiet, or onything else that will vex him,--I can bear my ain burden patiently, and warld's loss is the least part o't." Astonished and interested at this picture of patient, grateful, and high-minded resignation, Morton could not help bestowing an execration upon the poor-spirited rascal who had taken such a dastardly course of vengeance.