_Fig. A._ Orthoceratitis portio, cujus pars inferior saxo adhuc adhæret; ex lapide calcareo constans lente in apicem decrescens. Licet ex parvis ejus fragmentis judicari possit, cylindrum esse orthoceratitem, ea tamen si conjunguntur, verum formant conum, et mihi videtur ex crassitie siphonis, orthoceratitem hunc conicum duos fere superavisse pedes. Vidi orthoceratitem in alio lapide calcareo, quem etiam ibidem loci, Kelwikæ, reperi, longitudine duorum cum semisse pedum: sed impossibile erat, integrum eum excutere, nimis enim fragile erat. Est portio hæc orthoceratitis testa sua ambiente vestita in _a b c_. Quinque conspiciuntur articuli, thalami quondam, arctissime sibi invicem insidentes, per quos a latere procedit sipho _m n_ sat crassus, qui in omnibus fere, quas possideo portionibus orthoceratitarum, a centro semper remotus, hic ad peripheriam positus conspicitur. Sipho admodum lente decrescit, ex quo etiam de longitudine coni hujus judicare licet. Crustæ vel testæ _a b c_ interior pars, quæ articulos tegit, crysstallina est, ex spati crystallis tenuioribus irregularibus constans. [Illustration: _Philos. Trans. Vol. L._ TAB. XXIII. _p. 692_. _J. Mynde sc._] _Fig. B._ Portio alia, in qua articuli minus crassi; sipho quoque ad peripheriam positus, testa sua in _a_ tecta. Conspicitur septum illud testaceum in _b_, communi tenuior, quod ab ipso articulo superiori procedens, siphonis partem _r s_ investit. _Fig. B, C._ Portio orthoceratitis ex lapide calcareo cineracei coloris: sipho vero, fluore spatoso egregie crystallisato, constat. _Fig. C._ Portio alia per axin divisa, cujus pars exterior, testa quæ striis circularibus levioribus externe ornata, investita conspicitur. Ex parte interiori _Fig. D._ confirmatio ejus interna adparet. Sipho _x z_ gracilior, inter centrum et peripheriam positus, dimidia parte ambiente articulo denudatus adparet; dimidia altera, inferiori articulo _c d e_ tegitur. Articulus _a b_ spato crystallisato pellucido polygono repletus est. Articulus _c d e_ vero, saxo spatoso incarnato paululum repletus est. _x_. Siphonis pars superior, ubi radii a peripheria ad centrum tendentes conspiciuntur. Inter crystallos spatosos in articulo _a b_ striæ hinc et inde adparent nigræ, asphalto repletæ; ita etiam cavitas articuli _a b_, æque ac superficies convexa articuli _c e_, quæ in primam concavam recipitur, lamina asphalti vestitæ sunt. _Fig. E._ Pars alia orthoceratitis majoris, et quidem facies exterior. _Fig. F._ Facies ejus interior, in medio divisi, cum siphone transeunte satis crasso. _a b c_ et reliquæ striæ leves, sunt diaphragmata, articulos _a b_ invicem separantia, siphonem proprie constituentia, siphonisque tenuiorem membranam, quæ in _o_ et _p_ adhuc conspicitur, ambientia. Sunt diaphragmata hæc crassiora in siphonis vestigiis, et sibi invicem ab inferiori parte insident. Sipho hic inter centrum et peripheriam positus est.